Tımýr Jaqsylyqov «Bıznestiń jol kartasy-2025» baǵdarlamasynyń negizgi tetikterin atady
«Ózderińiz biletindeı, otandyq kásipkerlerdi qoldaý men damytýǵa memleket basym kóńil bóledi. «Bıznestiń jol kartasy-2025» baǵdarlamasy 2010 jyldan bastap tabysty iske asyrylýda. Shaǵyn jáne orta bıznesti memlekettik qoldaý baǵdarlamalar ishinde eń suranysqa ıe baǵdarlama sanalady. Baǵdarlama bıznesti qarjylaı jáne qarjylaı emes qoldaýdy qarastyrady. Osy jyly ShOB-ty jeńildikti kredıtteý jalǵasýda. «BJK-2025»-tegi qoldaýdyń negizgi qarjy quraldary paıyzdyq mólsherlemeni sýbsıdııalaý jáne kásipkerlerdiń kredıtterine kepildik berý, memlekettik granttar berý, sondaı-aq bıznes jobalaryna jetispeıtin ınjenerlik ınfraqurylymdy jetkizý bolyp otyr»,- dedi Tımýr Jaqsylyqov Ortalyq kommýnıkatsııalar qyzmetindegi baspasóz máslıhatynda.
Onyń atap ótýinshe, «BJK-2025» baǵdarlamasy aıasynda jeńildikti kredıtteý jyldyq 6 paıyz mólsherlememen, 5 jyl merzimge beriledi. Kredıt somasy 7 mlrd teńgege deıin, salalyq shekteý joq. Sonymen birge, 2019 jyldan bastap «BJK-2025» baǵdarlamasy aıasynda basym jobalarǵa kredıt berý tetigi engizildi.
«Qalyń jurtshylyq úshin bul tetik «Qarapaıym zattar ekonomıkasy» baǵdarlamasy retinde belgili. Baǵdarlama halyq tutynatyn taýarlardy qoldaýǵa baǵyttalǵan. Osylaısha, qarapaıym zattar ekonomıkasy jumys istep turǵan kásiporyndardyń qýatyn júkteýge, áleýmettik mańyzy bar azyq-túlik taýarlary boıynsha eldiń azyq-túlik qaýipsizdigin qamtamasyz etýge jáne olarǵa halyqtyń qoljetimdiligin arttyrýǵa múmkindik beredi. Baǵdarlama aıasynda kásipkerlerge 6 paıyz mólsherleme boıynsha jeńildikpen kredıt berý usynylady. Kredıt somasy shektelmeıdi, al sýbsıdııalaý merzimi - 10 jyl. Ekonomıkalyq qyzmet túrleriniń jalpy jikteýishi boıynsha kredıtteýdegi basym jobalardy irikteýdiń negizgi krıterııi taýarlar tizbesi bolyp sanalady», - dedi ol.