Tımýr Súleımenov jyl basynan bergi ınflıatsııa deńgeıin atady

ASTANA. QazAqparat - Aǵymdaǵy jyldyń birinshi toqsanynda elimizdiń jalpy ishki óniminiń ósimi 3,8 paıyzdy qurady. Bul týraly búgin Úkimet otyrysynda QR Ulttyq ekonomıka mınıstri Tımýr Súleımenov aıtty, dep habarlaıdy QazAqparat tilshisi.

«Qazaqstandaǵy ekonomıkalyq belsendilik jaǵymdy serpindi kórsetýdi jalǵastyrýda. Alaıda, ótken aımen salystyrǵanda birqatar báseńdeý baıqalyp otyr. Jalpy ishki ónimniń ósýi 3,8 paıyzdy qurady. Báseńdeý bárinen buryn qurylystaǵy jáne metallýrgııadaǵy baıaýlaýmen negizdeledi. Jalpy alǵanda ekonomıkadaǵy ósý ınflıatsııalyq qysymnyń tómendeýimen jáne joǵary ınvestıtsııalyq belsendilikpen súıemeldenip otyr», - dedi mınıstr.

Onyń dereginshe, ınflıatsııa jyldyń basynan beri 2,2 paıyzdy qurady. 2017 jylǵy sáıkes kezeńmen salystyrǵanda 0,5 paıyzdyq tarmaqqa tómen. Jyldyq ınflıatsııa 6,5 paıyzdyq deńgeıinde tirkeldi. Inflıatsııany jańa aralyqta ustap turý qamtamasyz etilýde.

«Aǵymdaǵy jylǵy 1 mamyrǵa eldiń halyqaralyq rezervteri 1,8 paıyzǵa artyp, 90,7 mlrd AQSh dollaryna deıin ulǵaıdy. Altyn valıýta rezervteri 3,4 paıyzǵa ósti. Ulttyq qordyń aktıvteri 0,9 paıyzǵa artty», - dedi Tımýr Súleımenov.