Tımýr Súleımenov ShOB-ty salyqtan bosatý týraly: bıýdjetke az shyǵyn keltire otyryp, úlken nátıje alamyz

NUR-SULTAN. QazAqparat – QR Prezıdent Ákimshiligi basshysynyń orynbasary Tımýr Súleımenov Prezıdenttiń shaǵyn bıznesti úsh jylǵa salyqtan bosatý týraly sheshimine pikir bildirdi, dep habarlaıdy QazAqparat.

«Biz «shaǵyn jáne orta bıznes» uǵymyna úırenip qalǵanbyz. Bul joly tek shaǵyn bıznes salyqtan bosatylady. Sebebi, orta bıznes – óz aıaǵynda nyq turǵan, óndiristik bazasy men tehnologııasy bar kásiporyn. Sondyqtan, olar elimizdegi salyq júıesiniń negizgi tiregi bolýy tıis. Salyq Kodeksinde olarǵa túrli jeńildikter qarastyrylǵan, sondyqtan eldiń bıýdjettik turaqtylyǵy turǵysynan qaraǵanda orta bıznesti salyqtan bosatý durys emes», - dep túsindirdi T. Súleımenov «Habar 24» arnasynda tikeleı efırde bergen suhbatynda.

Onyń aıtýynsha, Qazaqstandaǵy mıkro jáne shaǵyn bıznes salyqtary bıýdjet tabysynyń 8,4% quraıdy.

«Bul reforma bıýdjetke az shyǵyn keltire otyryp, úlken ekonomıkalyq nátıje alýǵa septigin tıgizedi. Prezıdent Úkimetke mıkro jáne shaǵyn bıznes kompanııalaryn tabys salyǵynan 3 jylǵa bosatý týraly zańdy negiz qurýdy tapsyrdy. Munda temeki, ishimdik syndy aktsızdik taýarmen aınalysatyndar, jer qoınaýyn paıdalanatyndar syndy keıbir sanattar jeńildikke ilinbeıdi. Sonymen birge, qyzmetker men jumysshy jaldap otyrǵan kásipkerler salyqtan bosatylady. Biz budan úlken nátıje kútip otyrmyz», - dedi Tımýr Súleımenov.

Eske sala ketsek, búgin QR Prezıdenti Qasym-Jomart Toqaev Qazaqstan halqyna Joldaýyn oqydy.

Joldaýda Prezıdent mıkro jáne shaǵyn bıznesti tabys salyǵynan úsh jylǵa bosatýdy tapsyrdy.