Tımýr Súleımenov orta merzimdi aralyqtaǵy Ulttyq banktiń negizgi maqsatyn aıtty
«Ulttyq banktiń Aqsha-kredıt saıasaty komıteti bazalyq mólsherlemeni 14,25% deńgeıinde saqtaý týraly sheshim qabyldady. Sheshim naqty derekterdi taldaý men táýekelder balansyn eskere otyryp jasaldy. Sonymen qatar, ınflıatsııa men ekonomıkanyń ósýi boıynsha boljamdarymyz jańartyldy. Shildede jyldyq ınflıatsııa ósti, biraq ol Ulttyq banktiń mamyrdaǵy boljamy sheginde saqtaldy. Bazalyq ınflıatsııa jáne maýsymdyq faktorlardan tazartylǵan ınflıatsııa ekinshi aı qatarynan jedeldedi. Syrtqy ınflıatsııalyq jaǵdaı qalypty dep baǵalanyp otyr. Jahandyq ınflıatsııa báseńdep keledi», - dedi T.Súleımenov
Onyń aıtýynsha, ishki ekonomıkada ınflıatsııalyq qysym kúsheıip keledi.
«Qazirgi kezde aıyrbastaý baǵamynyń jaqynda ǵana álsiregenin eskersek, aǵymdaǵy aqsha-kredıt sharttary jumsarǵany baıqalady. Aqsha-kredıt sharttarynyń jumsarýy aqsha naryǵy mólsherlemesiniń dınamıkasymen de rastalady. Jumsarǵan aqsha-kredıt sharttary mólsherlemeni odan ári tómendetý úshin keńistik ashpaıdy. Monetarlyq sharttardyń odan ári shamadan tys jumsarýyn boldyrmaı, óteý úshin bazalyq mólsherlemeni aǵymdaǵy deńgeıde saqtaýdy qajet etti. Jańartylǵan boljamdar táýekel balansynyń proınflıatsııalyq baǵytqa aýysqanyn kórsetedi. Bul bazalyq mólsherlemeni 2024 jyldyń sońyna deıin aǵymdaǵy deńgeıde saqtap qalýǵa ıtermeleıdi», - dedi UB basshysy.
Onyń sózine qaraǵanda, Qazaqstan ekonomıkasynyń 2024 jyly ósý boljamy 3,5-4,5% sheginde saqtalǵan. Bıyl iskerlik belsendilik fıskaldyq sharalar, tutyný suranysynyń ósýi jáne munaı salasyna jatpaıtyn sektordaǵy ınvestıtsııalyq belsendilik esebinen yntalandyrylatyn bolady. 2025 jyly boljam 5,1-6,1%-ke deıin arttyrý jaǵyna qaıta qaraldy. 2026 jyldyń sońyna qaraı ekonomıkanyń jyldyq ósimi 4,9-5,9% sheginde qalyptasady dep kútilýde. 2025-2026 jyldary fıskaldyq máselelermen qatar, jalpy ishki ónimniń ósimine munaı óndirýdi ulǵaıtý, sondaı-aq Úkimet júzege asyrýǵa josparlanǵan sharalar arqyly qosymsha úles qosatyn bolady.
«Bizdiń basty maqsatymyz – ortamerzimdi keleshekte ınflıatsııany 5% deńgeıinde ustaý. Jańartylǵan boljamdar men aǵymdaǵy ınflıatsııalyq úderis ustamdy qatań aqsha-kredıt sharttaryn uzaq ýaqyt saqtaý qajettigin kórsetip otyr. Biz óz mandatymyzǵa sáıkes, aqsha-kredıt saıasatyn kelip túsetin derekter men táýekelder balansyna beıimdeı otyryp, ınflıatsııany 5 paıyzdyq maqsatty deńgeıge jyldam qaıtarý úshin bar kúshimizdi salamyz», - dedi ol.