Tımýr Súleımenov Qazaqstan eksporttaıtyn taýarlardy atady

ASTANA. QazAqparat - Qazaqstannyń syrtqy saýda aınalymy turaqty ósý úrdisin saqtap otyr. 2018 jyldyń alǵashqy 8 aıynda 21,6% (59,8 mlrd AQSh dollary) ósim baıqaldy, dep habarlaıdy QazAqparat tilshisi.

Bul týraly QR Ulttyq ekonomıka mınıstri Tımýr Súleımenov 2018 jyldyń 10 aıyndaǵy áleýmettik-ekonomıkalyq damý qorytyndylary týraly baıandamasynda aıtty.

«Eksport 28,2% (39,1 mlrd AQSh dollaryna) ósti. Bul munaıdy (45,4%), agroónerkásip kesheni ónimderin (30,1%), munaı gazdaryn (30,2%), alıýmınııdi (24%) jáne mys kenderin (12,5%) jetkizýdiń artýyna baılanysty», - dedi mınıstr Úkimet otyrysynda.

Óz kezeginde ımport 10,8% (20,8 mlrd AQSh dollaryna) ósti. Kóbinese ol ımporttalatyn ınvestıtsııalyq taýarlar (mashına jáne jabdyqtar) esebinen ósken.

«Investıtsııalyq taýarlar ımportynyń ósýi 20,4% qurady. Sondaı-aq, qara metal jáne farmatsevtıka ónimderiniń ımporty tıisinshe 15,8% jáne 13,6% ósti», - dep óz sózin tolyqtyrdy T. Súleımenov.