Tımýr Súleımenov ınflıatsııamen kúres jaıynda baıandap berdi
«Bizde jarty jyl boıynsha ınflıatsııanyń qorytyndysy jasaldy. Inflıatsııa 5,9 paıyz kórsetkishine deıin tómendedi. Atap aıtqanda, bizde azyq-túlik taýarlary boıynsha ınflıatsııa 0,1 paıyzdy qurady. ıAǵnı deflıatsııa kategorııasyna shyqtyq», - dedi mınıstr Úkimet otyrysynan keıin.
Onyń boljamyna qaraǵanda, jyl sońyna deıin Qazaqstan osy ońtaıly qarqyndy saqtap qalady.
«Eger de ótken jyly ósim 0,7 paıyz bolsa, bıyl 0,1 paıyz deńgeıinde. Bul óz kezeginde aıtarlyqtaı jaqsy kórsetkish. Sondyqtan, bizdiń 2018 jylǵa mejelegen makroekonomıkalyq ındıkator (ınlıatsııanyń dálizi 5-7 paıyz deńgeıinde) qazirgi kezde oryndalyp keledi. Bizdiń oıymyzsha, jyl sońyna deıin osy dáliz tóńireginde bolamyz», - dedi T. Súleımenov.
Budan bólek ol atalǵan máselede aldaǵy jylǵy talaptarǵa toqtaldy.
«Kelesi jyldan bastap bizde qatań talaptar belgilengen. Sondyqtan 4,6 paıyz sanatyna enýge tyrysamyz. Sáıkesinshe, bul dálizden shyqpaýǵa mán beremiz. Bul óz kezeginde kóptegen faktorlarǵa áser etedi, ıaǵnı halyqtyń ál-aýqatyna, naqty tabysyna yqpaly bar», - dedi vedomstvo basshysy.