Tımýr Súleımenov bankterdi bızneske qolaıly jaǵdaı jasaýǵa shaqyrdy
QR Ulttyq bank tóraǵasy Tımýr Súleımenov elimizdiń ekonomıkalyq damýyn qamtamasyz etýdegi qarjy sektorynyń róli týraly aıtty.
«Biz qazir jańa mindetter aldynda turmyz. Memleket basshysy naqty sektordy nesıelendirýdiń jyl saıynǵy ósimin keminde 20%-ǵa qamtamasyz etý degen aýqymdy maqsat qoıdy. Maqsatqa qol jetkizý elimizdiń ekonomıkalyq damýyn qamtamasyz etip, bızneske qolaıly jaǵdaı týǵyzady. Ol úshin qarjy sektory kapıtaldy qaıta bólýdiń negizgi rólin tıimdi oryndaýy kerek. Banktik qyzmetterdi tsıfrlandyrý úrdisin jalǵastyrý jáne nesıeleý salasynda ınnovatsııalyq tehnologııalardy engizý mańyzdy. Biz bankter ózderiniń negizgi qyzmetterine nazar aýdaryp, qaryz alýshylarǵa yńǵaıly sharttardy usyna otyryp, bızneske belsendi qoldaý kórsetedi dep kútemiz. Qarjy resýrstaryn qaıta bólýdiń, banktik emes sektordy damytýdyń jáne ekonomıkany qarjylandyrýdyń balamaly kózderiniń tıimdi arnasy retinde qor naryǵyn qurý mańyzdy. Memleket óz tarapynan naqty sektordy nesıelendirýdiń ósimin damytý úshin qajetti jaǵdaı jasap jatyr», - delingen Ulttyq bank basshysynyń baıandamasynda.
Ol Memleket basshysynyń tapsyrmasy boıynsha qarjy sektorymen birge birqatar mańyzdy zańnamalyq bastama júzege asyrylyp jatqanyn atap ótti.
«Qolaıly normatıvtik-quqyqtyq ortany qurýǵa, ulttyq jáne qarjylyq ınfraqurylymdy damytýǵa jáne qarjylyq tehnologııalardy qoldaýǵa erekshe nazar aýdarylatyn bolady. Biz sondaı-aq qarjy naryǵynda jasandy ıntellektiniń damýyn retteý men yntalandyrýdyń ońtaıly strategııasyn ázirleý boıynsha belsendi jumys isteıtin bolamyz. Qarjy resýrstarynyń qoljetimdiligin qamtamasyz etý arqyly ekonomıkalyq ósý men eldiń turaqty damýy – bizdiń ortaq mindetimiz», – dep esepteıdi Tımýr Súleımenov.