Tımýr Súleımenov 2018 jylǵy munaıdyń boljamdy baǵasyn atady

ASTANA. QazAqparat - 2018 jylǵy munaıdyń boljamdy baǵasy 1 barreline 55 AQSh dollaryna deıin ulǵaıtyldy. Bul týraly búgin Úkimet otyrysynda 2018 jylǵa arnalǵan negizgi makrokórsetkishter men bıýdjet parametrleri boljamynyń naqtylaýyn usynǵan QR Ulttyq ekonomıka mınıstri Tımýr Súleımenov málim etti, dep habarlaıdy QazAqparat.

«Birinshiden, 2017 jyly nomınaldy jalpy ishki ónim 52,4 trln teńge deńgeıinde baǵalanady. Naqty ósimi 4,0 paıyzdy qurady. Ekinshiden, 2018 jylǵy qańtar-aqpanda ekonomıkanyń ósimi 4,0 paıyz boldy. Úshinshiden, 2018 jyly munaıdyń boljamdy baǵasy bir barreline 45 AQSh dollarynan 55  AQSh dollaryna deıin ulǵaıdy. Metaldardyń baǵa ındeksi 0,4 paıyzǵa artty. Tórtinshiden, AQSh dollaryna qatysty teńgeniń eseptik baǵamy 340 teńge deńgeıinde saqtaldy», - dedi mınıstr.

Onyń aıtýynsha, 2017 jylǵy naqtylanǵan bazany esepke ala otyryp, 2018 jyly nomınaldy jalpy ishki ónim 57,2  trln teńge kóleminde boljanady. Ol tamyzda maquldanǵan kórsetkishten 1,3 trln  teńgege artyq. Naqty jalpy ishki ónimniń ósýi 3,8 paıyz deńgeıinde kútilýde.

Jan basyna shaqqandaǵy jalpy ishki ónim 9 200 AQSh dollarǵa deıin ulǵaıady. Ónerkásiptiń ósýi 3,3 paıyzǵa deıin artýymen qaıta qarastyryldy. Bul óńdeý ónerkásibiniń kútiletin asa joǵary ósimimen baılanysty. Energetıka mınıstrliginiń boljamdary boıynsha 2018 jyly munaı óndirý kólemi 87 mln tonnany quraıdy. Munaıdyń álemdik baǵalarynyń ulǵaıýyn jáne ekonomıkanyń ósimin eskere otyryp, eksport 54 mlrd AQSh dollaryna deıin, al ımport 34 mlrd AQSh dollaryna deıin artady. Inflıatsııa bekitilgen 5,0-7,0 paıyz dálizinde saqtalady», - dedi Tımýr Súleımenov.