Tımýr Qulybaev bıýdjet shyǵynyn 150 mlrd teńgege azaıtý jolyn aıtty

NUR-SULTAN. QazAqparat – Kedendik ákimshileýdi jetildirý arqyly bıýdjet shyǵynyn 150 mlrd teńgege deıin qysqartýǵa bolady. Bul týraly Bıznesti qorǵaý jónindegi IV forýmda «Atameken» Ulttyq kásipkerler palatasy Tóralqasynyń tóraǵasy Tımýr Qulybaev aıtty, dep habarlaıdy QazAqparat tilshisi.

«Memlekettik bıýdjettiń aıtarlyqtaı áleýetti kirisi kedendik salada jasyryn jatyr. Qytaı boıynsha aınaly kedendik statıstıkadaǵy aıyrmashylyq shamamen 7 mlrd dollardy quraıdy. Bul kontrafaktilerdi jetkizýshilerge qyzmet kórsetetin kólegeıli saýdanyń negizgi sebepteriniń biri», - dedi Tımýr Qulybaev.

Osy rette ol elimizdiń Qarjy mınıstrliginiń deregine sáıkes, Qazaqstan-Qytaı shekarasyndaǵy shyǵyn 200 mlrd teńgeden astamǵa qysqaratyndyǵyn aıtty. Mundaı mol qarajatqa shekaradaǵy baqylaý-ótkizý pýnktterin jańǵyrtý esebinen qol jetkizilmek.

«Buǵan qosa, kedendik ákimshileýdi odan ary jetildirý esebinen bıýdjet shyǵynyn 100-150 mlrd teńgege qysqartý áleýeti bar», - dedi ol.