Tımýr Kapadze olımpıadalyq qalashyqtaǵy qıyndyqtar jóninde aıtyp berdi

<p>ASTANA. KAZINFORM - Fýtboldan Ózbekstan olımpıadalyq quramasynyń bas bapkeri Tımýr Kapadze Ispanııamen ótken oıyn jáne Olımpıadada Ózbekstan quramasy tap bolǵan qıyndyqtar jóninde áńgimelep berdi.</p>

Keshe, 24 shildede Ózbekstan quramasy olımpıadalyq fýtbol týrnırinde alǵashqy oıynyn Ispanııaǵa qarsy ótkizdi jáne qarsylasyna 1:2 esebimen ese jiberdi. 

«Bul jerde qıyndyqtar kezdesip jatyr. Olımpıadalyq qalashyqqa kelgeli beri biz ár kún saıyn túrli oqıǵalarǵa tap kelip jatyrmyz. Ǵımaratqa baılanysty problema, jattyǵýǵa barý jáne kelý jolyna baılanysty keleńsizdik kezdesedi. Sondaı-aq avtobýs ýaqytyly kelmeıdi. Jolǵa ýaqyt ketedi. Oǵan kóp ýaqyt jumsaımyz. Bul tek bizdiń quramaǵa tán emes. Ózge komandalar da dál osyndaı problemamen kezdesip otyr», - dedi ol. 

Tımýr Kapadze olımpıadalyq qalashyqta tek fýtbolǵa daıyndyq máselesi ǵana emes ózge de suraqtardy sheshýge týra kelgenin aıtady. 

«Biz kelgen alǵashqy kúni ornalystyrǵan ǵımarattan erteńine shyǵýymyzdy surady. Atalǵan ǵımarat bizge arnalmaǵan eken», - dedi Tımýr Kapadze.

Bas bapkerdiń aıtýynsha, ár kún saıyn komandada túrli jaǵdaılar týyndaıdy. Ony sheshýge barlyǵy birdeı atsalysady. Dese de bul usaq dúnıeler quramanyń oıynǵa daıyndalýyna keri áserin beredi.

Ol basqa qalalarda fýtbol oıyndaryn ótkizip jatqan quramalarda mundaı problemalar joq ekenin atap ótti. Olar ornalasqan qonaq úılerde eshqandaı keleńsizdik baıqalmaıdy.