Tımofeı Skatov alǵash ret Rolan Garrostyń negizgi týrnırine joldama aldy

ASTANA. QazAqparat - Qazaqstandyq, álemniń 147-raketkasy Tımofeı Skatov alǵash ret Rolan Garrostyń negizgi týrnırine joldama aldy, dep habarlaıdy QazAqparat tilshisi.

Qazaqstandyq tennısshi irikteý saıystarynyń fınalynda dúnıejúzilik reıtıngte 165-orynda turǵan brazılııalyq Felıpe Melıgenı Rodrıges Alvespen joldama úshin synǵa tústi.

Birinshi partııada qos breıkke qol jetkizgen brazılııalyq sportshy basymdylyq kórsetti - 6:2. Ol ekinshi sette de 4:2 esebimen alǵa shyqty.

Degenmen qazaqstandyq tennısshi tarazy basyn aýdara bildi - 7:5. Sodan keıin úshinshi, sheshýshi sette jeńisti julyp aldy - 6:3.

Tartysty ótken báseke 2 saǵat 13 mınýtqa sozyldy.

Osylaısha, 22 jastaǵy T.Skatov óz sporttyq jolynda alǵash ret Frantsııa ashyq chempıonatynda oınaıtyn bolady. Onyń qarsylasy keıin anyqtalady.

Eske sala keteıik, budan buryn Jibek Qulambaevanyń Serbııadaǵy jarystyń jartylaı fınalyna shyqqanyn jazǵan bolatynbyz.