Tilektes Meıramov: Qazaq teatrynyń jańa ǵımaraty – búkil eldiń qýanyshy

NUR-SULTAN. QazAqparat – Jańa Qazaq drama teatrynyń salynýy – teatr ujymynyń ǵana emes, búkil qazaq halqy úshin úlken qýanysh. Elordada salynyp jatqan jańa Qazaq drama teatrynyń qurylysymen tanysý barysynda akter, professor, Qazaqstannyń halyq ártisi Tilektes Meıramov osyndaı pikir bildirdi, dep habarlaıdy QazAqparat tilshisi.

«Jańa Qazaq drama teatrynyń salynýy – teatr ujymynyń ǵana emes, búkil qazaq halqy úshin úlken qýanysh dep esepteımin. Óıtkeni, bizdiń jas astanamyzda osyndaı Qazaq teatry ǵımaratynyń bolmaýy – talaı adamnyń kókireginde júrgen másele edi. Talaı adamdy qynjyltyp júretin. Minekeı, biraz jyldan beri sheshilmeı júrgen másele rettelip, sol ǵımarattyń qurylysymen tanysyp jatyrmyz. Prezıdenttiń kómekshisi Máýlen (Máýlen Áshimbaev) myrza aıtyp ketkendeı, bul – úlken oqıǵa. Kez kelgen eldiń astanasynda sol eldiń teatry bolýy mindetti. Sondyqtan, bul biz úshin ǵana emes, búkil qazaq halqy úshin úlken qýanysh», - dedi jańa teatr nysanynyń qurylysymen tanysý barysynda Tilektes Meıramov.

Eske sala ketsek, búgin Prezıdenttiń kómekshisi Máýlen Áshimbaev Nur-Sultanda salynyp jatqan Qazaq drama teatry ǵımaratynyń qurylysymen tanysqan bolatyn.

«Kelesi jyly 6 shildede teatr ujymy óziniń qonys toıyn toılaıdy dep senemiz», - dedi Máýlen Áshimbaev.

Qurylys nysanymen tanysý barysynda Q.Qýanyshbaev atyndaǵy Memlekettik akademııalyq qazaq mýzykalyq drama teatrynyń kórkemdik jetekshisi Talǵat Temenov atalmysh teatrǵa «ulttyq» ataǵyn berýdi suraǵan bolatyn.