Tilder kúni: Aqmola oblysynda «Óz oıynym» ıntellektýaldyq vıktorınasy ótti

KÓKShETAÝ. QazAqparat - Kókshetaýda El Táýelsizdiginiń 30 jyldyǵy jáne Qazaqstan halqynyń Tilder kúnine arnalǵan onkúndik aıasynda «Óz oıynym» ıntellektýaldyq vıktorınasy ótti. Balalar memlekettik tildi ǵana emes, Qazaqstan halqynyń basqa da tilderin jaqsy biletinin kórsetti, dep habarlaıdy QazAqparat tilshisi oblystyq ishki saıasat basqarmasynyń baspasóz qyzmetine silteme jasap.

Vıktorınaǵa árqaısysy úsh qatysýshydan turatyn bes komanda qatysty.

Stýdentter tarıh, ádebıet, mádenıet boıynsha suraqtarǵa jaýap berip, ártúrli tilderdegi maqal-mátelder týraly bilimderin kórsetti.

Sharany oblystyq jastar resýrstyq ortalyǵy uıymdastyrdy.

Ondaǵy maqsat - stýdentterdiń Qazaqstan halqynyń memlekettik jáne basqa da tilderin úırenýge degen qyzyǵýshylyǵyn arttyrý. Sondaı-aq jastardyń shyǵarmashylyq jáne zııatkerlik qabiletin damytý.

«Oıyn joǵary deńgeıde ótti. Ár komanda qyzyǵýshylyq pen belsendilik tanytty, komandada jumys isteı aldy. Balalar memlekettik tildi ǵana emes, basqa tilderdi de jaqsy biletinderin kórsetti. Barlyq qatysýshylarǵa alǵysymyzdy bildiremiz jáne olarǵa tabys tileımiz», – dep atap ótti Jastar resýrstyq ortalyǵynyń mamany Aqylbek Ahmetov.

Abaı Myrzahmetov atyndaǵy Kókshetaý ýnıversıtetinde ótken zııatkerlik oıyn sońynda ár komandaǵa uıymdastyrýshylar atynan sertıfıkattar tabystaldy.

Aıta keteıik, óńirde Qazaqstan halqy tilderiniń onkúndigi aıasynda eki myńǵa jýyq túrli formattaǵy is-shara ótkizý josparlanǵan.