Tikushaq apaty: Óńirlerdegi barlyq áskerı bólimderde mıtıngter ótti

NUR-ASTANA. QazAqparat - Búgin Qazaqstan Qarýly Kúshteriniń barlyq óńirlerdegi áskerı bólimderi men quramalarynda mıtıngter ótkizildi. Onda jeke quram Qyzylorda oblysynda tikushaq apatynan qaza tapqan qyzmettesterine bir mınýt únsizdikpen qurmet kórsetti, dep habarlaıdy QazAqparat.

«Keshe oqý-jattyǵý barysynda QR QK tikushaǵynyń apatqa ushyraýy saldarynan bortta bolǵan 13 áskerı qyzmetshi kóz jumdy. Qazaqstan Qarýly Kúshteriniń barsha jeke quramy qaza bolǵan qyzmettesteriniń týysqandary men jaqyndarynyń qaıǵysyna ortaqtasyp, kóńil aıtady. Bul Qazaqstan armııasy úshin orny tolmas qaıǵy. Olar aqtyq demderi qalǵansha ózderiniń áskerı boryshtaryn adal oryndady. Qyzmettesteri týraly jarqyn estelik batyrlyq, janqııarlyq pen patrıotızmniń úlgisi retinde áskerı qyzmetshilerdiń jadynda máńgi este qalady», - delingen Qorǵanys mınıstrliginiń resmı habarlamasynda.

Eske salaıyq, 27 naýryz kúni keshke Qyzylorda oblysynyń Jalaǵash aýdanynda MI-8 tikushaǵy apatqa ushyrady.Qorǵanys mınıstrliginiń aqparatyna sáıkes, atalǵan tikushaq Aqtaý qalasynan Shymkentke bet alǵan 4 áskerı tikushaq quramynda bolǵan. Barlyq ekıpaj múshesi - 13 adam qaza tapty.