Tikushaq apaty: Batysqazaqstandyqtar kapıtan Syrym Másálimmen qoshtasty

ORAL. QazAqparat - Búgin Batys Qazaqstan jurtshylyǵy Qyzylorda oblysy aýmaǵynda apatqa ushyraǵan MI-8 tikushaǵynda bolǵan kapıtan Syrym Másálimdi sońǵy saparyna shyǵaryp saldy, dep habarlaıdy QazAqparat tilshisi.

«Sarytaý» shaǵyn aýdanyndaǵy №50 mektep aýlasynda ótken qaraly jıynda marqumnyń ata-anasy men týma-týysqandaryna óńir jurtshylyǵy atynan oblys ákimi Altaı Kólginov kóńil aıtty.

«Qyzylorda oblysynda bolǵan tikushaq apatynan 13 áskerı qyzmetker qaza tapty. Sonyń biri - Syrym Másálim baýyrymyz. Bul - orny tolmas aýyr qaza. Olar Otan aldyndaǵy boryshyn abyroımen atqaryp, elge adal qyzmet etti. Osyndaı ul tárbıelegeni úshin Syrymnyń ata-anasy Málkeı aǵa men Názııa apaǵa basymyzdy ıip, rızashylyǵymyzdy bildiremiz. Osynshama el jınalyp, qaıǵylaryńyzǵa ortaqtasýda. Arystaı azamattarymyzdyń qaza tabýyna baılanysty Elbasymyz Nursultan Nazarbaev olardyń týma-týysqandaryna, Qazaq eline kóńil aıtty. Prezıdentimiz Qasym-Jomart Toqaev kóńilin bildire otyryp, barlyq qoldaý-kómek sharalarynyń jasalatynyn atap ótti. Biz olardyń esimderin árdaıym jadymyzda saqtaımyz», - dedi oblys basshysy.

Marqumnyń otbasyna sondaı-aq QR Qorǵanys kúshteri Bas shtaby bastyǵynyń orynbasary, vıtse-admıral Jandarbek Januzaqov ta kóńil aıta otyryp, Otan qorǵaý jolynda qaza tapqan áskerı qyzmetkerlerdiń esimi máńgilik saqtalatynyn jetkizdi.

Qaraly jıynda aıtylǵanyndaı, Syrym Málkeıuly 1989 jyly 11 jeltoqsanda Syrym aýdany Araltóbe aýylynda dúnıege keldi.

1996-2007 jyldary Araltóbe aýylyndaǵy orta mektepte bilim alǵan Syrym Másálim Syrym aýdandyq qorǵanys jónindegi bólimi arqyly Aqtóbe qalasyndaǵy T.Bıgeldınov atyndaǵy áýe qorǵanys kúshteri áskerı ınstıtýtyna oqýǵa túsedi.

2011 jyly ınstıtýtty jaqsy aıaqtaǵannan keıin Syrym Málkeıuly Aqtaý qalasyndaǵy 30153-áskerı áýe bazasyndaǵy avıatsııalyq jabdyqtaý qyzmet kórsetý tobynda aǵa tehnık bolyp qyzmetin bastady. 2013 jyly 9 jeltoqsanda avtomattandyrylǵan baqylaý borttyq sandyq júıesi qyzmet kórsetý tobynyń top bastyǵy bolyp taǵaıyndaldy.

Syrym Másálim 2014 jyly Qamajaı Tólepbergenqyzymen otaý quryp, bir jyldan keıin Jáńgir esimdi uly dúnıege keldi.

Eske sala keteıik, budan buryn kapıtan Syrym Másálimniń bala kezinen ushqysh bolýdy armandaǵanyn jazǵan bolatynbyz.