«TikTok» jelisinde uıymdastyrylyp jatqan qumar oıyndar - zańsyz

ASTANA. QazAqparat - «TikTok» jelisinde qumar oıyndar taratylýda. Bul áreketter zańǵa qaıshy, dep habarlaıdy QazAqparat QR Qarjylyq monıtorıng agenttiginiń baspasóz qyzmetine silteme jasap.

Baspasóz qyzmetiniń habarlaýynsha, negizinen bul karta oıyny, súıek laqtyrý jáne onlaın rýletka. Barlyq jerde prıntsıp birdeı. Bás tigýge shaqyrady. Onyń tórtten biri uıymdastyrýshyda qalady, qalǵanyn jeńimpaz alady. Bás tigýlerdi qabyldaý jáne utystardy berý banktik onlaın aýdarymdar arqyly júzege asyrylady.

«Jelilik taldaý nátıjesinde biz onlaın oıyndy taratatyn 100-den astam akkaýnt anyqtadyq. Osy jerde uıymdastyrýshylar men qatysýshylarǵa bul árekettiń zańsyz ekenin eskertemiz. QR Qylmystyq kodeksiniń 307-babynda zańsyz oıyn bıznesin uıymdastyrǵany úshin jaýapkershilik qarastyrylǵan. Qazirdiń ózinde sottalǵandar bar.

Máselen, «TikTok» jelisinde qumar oıyn uıymdastyrǵan Almaty qalasynyń 2 turǵyny 4 aıda 13 mln teńgege jýyq tabys tapqan. Tergeý qorytyndysy boıynsha olardyń 1,5 jylǵa bas bostandyǵy shekteldi.

Sonymen qatar, qazirgi ýaqytta sot «TikTok» jelisinde uqsas mazmundaǵy kontent úshin 4 uıymdastyrýshyǵa qatysty is qaralýda.

Qurmetti azamattar, osyndaı qumar oıyndarǵa aralaspaýlaryńyzdy suraımyz. Bul zańǵa qaıshy. Sondaı-aq, ata-analardan balańyzdyń minez-qulqyna, onyń kóretin kontentine jáne onyń onlaın saýdasyna nazar aýdarýyn suraımyz»,-delingen habarlamada.