TikTok-taǵy Qazaqstan týrızmi týraly kontent 20 mln ret qaralǵan

ASTANA. QazAqparat – TikTok-tyń Qazaqstandaǵy týrızm týraly kontenti 20 mln qaralym jınaǵan. Bul týraly AstanaMediaWeek dástúrli halyqaralyq forýmynda Shyǵys Eýropadaǵy TikTok Global Business Solutions dırektory jáne TikTok Kazakhstan kompanııasynyń bolashaq basshysy Anastasııa Panına málim etti, dep habarlaıdy QazAqparat tilshisi.

«Qazaqstan Respýblıkasynda mádenıet jáne bilim salasyndaǵy uıymdar bizdiń qoǵamdastyqtyń múshesi bolady dep shyn júrekten úmittenemiz. Biz osy qatysýshylarǵa belsendi túrde kómektesemiz, olardy úıretemiz, damytamyz», - degen ol TikTok-tyń Qazaqstandy qamtıtyn jobalaryna toqtaldy.

«Biz platformadaǵy mazmundy árkelki etý úshin kóp kúsh jumsaımyz. Memleket ókilderine osy qatynastardaǵy yntymaqtastyq pen seriktestik úshin óte rızamyz. Jaqynda oqý-aǵartý mınıstrliginiń qoldaýymen jobany iske qostyq. Bul naýqan 90 mıllıonnan astam qaralym jınap, tanymdyq kontenttiń tanymal bolýyna túrtki boldy. Taǵy bir mysal – Kazakh Tourism-men birge jazda biz Travel Kazakhstan jobasyn iske qostyq. Onyń aıasynda ınternet paıdalanýshylar Qazaqstandaǵy saıahatqa shyǵýǵa bolatyn súıikti oryndardy bólisýge múmkindik aldy. Bul joba óte tanymal boldy jáne 20 mıllıonnan astam qaralym jınady. Sonymen qatar, jobaǵa qyzyǵýshylyq tek el ishinde ǵana emes, sonymen qatar Qazaqstannan tys jerlerde de baıqaldy. Bul Qazaqstandaǵy týrızmdi álemniń basqa bólikterinen kelgen adamdarǵa tartymdy etti», - dedi TikTok ókili.

Eske salsaq, TikTok QR Oqý-aǵartý mınıstrliginiń qoldaýymen qysqa beınerolıkterdi kórýge jáne jasaýǵa arnalǵan jetekshi platforma #QazaqstanMuǵalimderi baıqaýyn iske qosatyny habarlanǵan.