TikTok-ta QR Qorǵanys mınıstrliginiń feık akkaýnty ashyldy

NUR-SULTAN. QazAqparat – TikTok áleýmettik jelisinde QR Qorǵanys mınıstrliginiń feık akkaýnty ashyldy. Bul týraly stopfake.kz saıty jazýda, dep habarlaıdy QazAqparat.

Logıni mod.gov.kz dep atalatyn TikTok paıdalanýshysy ondaǵan beınerolık jarııalap úlgergen. Olardyń bir bóligi – QR Qarýly Kúshterimen baılanysty oqý-jattyǵýlardyń vıdeolary men jańalyqtardan úzindiler.
Shyn máninde bul akkaýnttyń QR Qorǵanys mınıstrligine eshqandaı qatysy joq. Bul týraly vedomstvodan habarlady.

«https://vm.tiktok.com/ZSeTLqDLB / siltemesi boıynsha ashylatyn TikTok akkaýnty feık bolyp tabylady. Onyń QR Qorǵanys mınıstrliginiń resmı akkaýnttaryna qatysy joq», – dep habarlady mınıstrliktiń baspasóz qyzmetinen.

Aıta keteıik, QR Qorǵanys mınıstrliginiń resmı saıtynda TikTok vedomstvonyń akkaýnttary bar áleýmettik jeliler tiziminde kórsetilmegen.