TikTok pen YouTube kóretinder úshin tarıfti kóterý usynyldy

NUR-SULTAN. QazAqparat – Qazaqstanda baılanys quny álemdegi eń tómen tólemderdiń biri sanalady. Naryq erejelerine saı ol birshama joǵary bolýy tıis. Mundaı pikirdi QR Tsıfrlyq damý, ınnovatsııa jáne aeroǵarysh ónerkásibi mınıstri Baǵdat Mýsın bildirdi, dep habarlaıdy QazAqparat tilshisi.

Onyń aıtýynsha, arzanshylyq saldarynan baılanys bazalyq stansalaryn ornatýǵa ınvestıtsııa tartý protsesi kúrdelenip otyr. Olardyń quny 100 myń dollarǵa jetedi. Al olarǵa qyzmet kórsetý odan da qymbatqa túsedi.

«Ekonomıka turǵysynan alǵanda eger siz bıznesmen retinde paıda tabý úshin bazalyq stansa ornatpaq bolsańyz, onda ol – tıimsiz. Eger siz aýylǵa bazalyq stansa ornatsańyz, 200 adam 2 myń teńgeden tóleıdi. Ol qansha bolady? Bazalyq stansa júzdegen myń dollar bolsa, qyzmet kórsetý odan da qymbat (...). Eger ekonomıkalyq kórsetkishterge qarasaq, naryq erejesimen júrsek, onda olar (baılanys operatorlary) baǵany kóterý kerek. Al biz olarǵa: «Joq, toqtańyzdar. Bul áleýmettik másele» dep otyrmyz», - dedi Baǵdat mýsın Májilis depýtattary men baılanys operatorlary ókilderine arnalǵan ashyq esik kúninde.

Onyń málimetinshe, sońǵy 2-3 jyldyń ishinde derekter trafıgi 100 paıyzǵa artqan. Bazalyq stansanyń naqty bir ótkizý qabileti bar ekendigin eskerer bolsaq, onda trafık jyldan-jylǵa artyp keledi. Al TikTok-tyń keńinen tanymal bolýyna baılanysty baılanys arnalaryna júkteme de aıtarlyqtaı arta túsken. Sondyqtan da mınıstrlik trafıkterdi jikteý múmkindigin qarastyryp jatyr.

«Vıdeotrafıkke baǵa sál kóterilýi tıis. Sóılesýge, WhatsApp-pen hat almasýǵa soma az bola bersin. Nelikten kúni boıy úıinde TikTok pen YouTube kóretinder men kúni boıy bazarda jumys istep, bıznes júrgizetinder birdeı 3 myńnan tóleýi tıis? Onda olar jeke tólesin. Óıtkeni olar qosymsha júkteme jasap otyr», - dedi mınıstr.