TikTok-pen balalar quqyqtaryna qatysty kelissóz bastadyq – Aqparat mınıstri

ASTANA. QazAqparat –Aqparat jáne qoǵamdyq damý mınıstri Darhan Qydyráli qazaq tilinde kontent jasaýshylardyń VI forýmynda onlaın platformalardaǵy qazaqsha kontenttiń úlesi 87 paıyzǵa jetkenin aıtty, dep habarlaıdy QazAqparat tilshisi.

«Úshinshi baǵytymyz – qazaq tildi kontentti damytý. Bul baǵytta jańa aıtyp ketken doktrına boıynsha naqty sharalar josparyn bekitkenbiz. Qazirgi kezeńde qazaq tilinde memlekettik BAQ-taǵy ortasha statıstıka – 85 protsent. Biz muny taǵy da arttyrýdy kózdep otyrmyz. Ásirese onlaın platformalarda 87 protsentke deıin (qazaq tilinde kontent -red.) ósti. Sany da, sapasy da artyp keledi. Sondyqtan jalpy myna kreatıvti ındýstrııaǵa, serıaldarǵa, basqa da ónimderimizge ishki naryqta ǵana emes, syrtta da suranys kóp», - dedi mınıstr.

Onyń sózinshe, bul saladaǵy álemniń alpaýyt kompanııalary Qazaqstan naryǵyna qyzyǵýshylyq tanytyp otyr.

«Sonyń ishinde ókildikterin ashý máselesi, Qazaqstanda tirkelý, ınterfeısterin qazaqshalaý máselesi sheshimin taýyp jatyr. Mysaly TikTok bizdiń usynysymyz boıynsha ınterfeısin qazaqshalady. Jalpy TikTok-pen balalar quqyqtary, basqa da máseleler boıynsha kelissózderdi bastap kettik.

Mamyr aıynyń sońynda jańa medıa forýmyn ótkizemiz. Soǵan barshańyzdy shaqyramyz. Ol jerde biz jasandy zeıin jóninde keńirek áńgimeleımiz dep oılaımyn», - dedi mınıstr.