TikTok Qazaqstanmen yntymaqtastyqty keńeıtýge nıetti

NUR-SULTAN. QazAqparat - Shyǵys Eýropadaǵy TikTok ókildiginiń dırektory Oleg Sokolov QR Syrtqy ister mınıstriniń orynbasary Almas Aıdarovpen jáne «Kazakh Invest» UK» AQ ókilderimen kezdesý barysynda kompanııanyń Qazaqstanmen yntymaqtastyqty keńeıtýge nıetti ekenin jetkizdi. Bul týraly «Kazakh Invest» UK baspasóz qyzmeti málim etti, dep habarlaıdy QazAqparat.

«Oleg Sokolov TikTok kompanııasynyń Qazaqstan aýmaǵynda ulttyq teatrlar men mýzeılerdi ilgeriletýdi qosa alǵanda, platformanyń mádenı-tanymdyq kontentin kúsheıtý jónindegi nıetin atap ótti. Óz kezeginde Almas Aıdarov Qazaqstanda kompanııa ókildigin ashý múmkindigin qarastyrýdy usyndy jáne kompanııanyń eldegi bastamalaryna jan-jaqty qoldaý kórsetýge daıyn ekenin habarlady», - delingen kompanııa málimdemesinde.

TikTok kompanııasy delegatsııasynyń elimizge kelý maqsaty - bilim berý, mádenıet, týrızm salasyndaǵy jobalar jáne Qazaqstan aýmaǵynda platformany damytýdyń basqa da máselelerin talqylaý. Osy maqsatta eldegi birqatar mınıstrlikter jáne memlekettik organdardyń basshylarymen kezdesýler ótkizip, ózara yntymaqtastyqty nyǵaıtýǵa kelisken.

Aıta ketsek, osydan eki aı buryn QR Bilim jáne ǵylym mınıstrligi TikTok paraqshasyn ashqan edi.