Tiji, Nickelodeon balalar arnasy qazaq tilinde kórsetiledi

NUR-SULTAN. QazAqparat – Tiji, Nickelodeon arnalarynyń balalar kontenti qazaq tilinde jaryq kóredi, dep habarlaıdy QazAqparat tilshisi.

Bul jaıynda QR Aqparat jáne qoǵamdyq damý mınıstrliginiń keńeıtilgen alqa májilisinde belgili boldy.

Mınıstr Asqar Ýmarov óz sózinde qoǵamdyq sanany jańǵyrtý salasynda alty negizgi baǵyt jatqanyn atady.

«Byltyrdan bastap baǵdarlama óskeleń urpaqty, ásirese oqýshylardy jáne mektep jasyna deıingi balalardy tárbıeleýge basymdyq berdik. «Ulttyq tárbıe», Tiji jáne Nickelodeon arnalarynyń balalar kontentin qazaq tiline aýdarý sekildi aýqymdy jobalardy júzege asyryp jatyrmyz. Aıtpaqshy, Tiji jáne Nickelodeon qazaq tilinde jaqynda shyǵady, tusaýkeseri ótedi», - dedi vedomstvo basshysy.

Onyń málimeti boıynsha, bul baǵyttaǵy basty basymdyq – «Ulttyq rýhanı jańǵyrý» jáne Jol kartasy jobalaryn sapaly iske asyrý.

«Bul strategııalyq qujattar Qazaqstandyq biregeılik pen zııatkerlik áleýetti, memlekettik tildi damytýǵa, ulttyń mádenı kodyn saqtaýǵa jáne ilgeriletýge, jastardyń jan-jaqty damýy men ózin-ózi tanytýyna baǵyttalǵan», - dedi Asqar Ýmarov.