Tıimsizdigine baılanysty 200 mlrd. teńge shamasyndaǵy salyqtyq jeńildikter joıylýy múmkin

ASTANA. QazAqparat - Elimizde tıimsiz salyqtyq jeńildikter joıylýy múmkin, al olardyń shamasy 200 mlrd. teńgeni quramaq. Bul týraly búgin Senatta salyqtyq tıimdilikter máselesine arnalǵan «dóńgelek ústel» otyrysynda Ulttyq ekonomıka vıtse-mınıstri Marat Qusaıynov málim etti.

Vıtse-mınıstrdiń sózine qaraǵanda, aǵymdaǵy jyly Parlamentke Úkimetten zań jobasy engizilip, onda agrobıznes sýbektilerin túbegeıli qoldaýǵa baǵyttalǵan salyqtyq ózgerister qamtylǵan bolatyn. «Osy baǵytta zań jobasy aıasynda salyqtyq jeńildikterge tekserýler júrgizildi. Solardyń nátıjesi boıynsha jalpy somasy 200 mlrd teńgeni quraıtyn salyqtyq jeńildikterdi joıý usynylyp otyr», - deıdi Marat Qusaıynov.

Atap aıtqanda, aýyl sharýashylyǵy taýaryn óndirýshiler úshin arnaıy salyqtyq rejımder aıasyndaǵy jer salyǵyn 70 paıyzǵa azaıtý, strategııalyq ınvestıtsııalyq jobalar úshin múliktik jáne jer salyǵyn salyqtan bosatý, Qazaqstan Damý bankiniń jumys istemeıtin aktıvterin Qazaqstannyń ınvestıtsııalyq qoryna berý barysyndaǵy salyqtyq jeńildikterdi joıý kózdelip otyr. Budan bólek, dıvıdendterge salyq salý barysyndaǵy jeńildikterdi, qarjy lızıngi boıynsha korporatıvtik tabys salyǵynyń syıaqysyna salyqtyq jeńildikterdi, sondaı-aq aıaqtalýynyń naqty merzimderi kórsetilgen ýaqytsha jeńildikterdi joıý qarastyrylady. Vıtse-mınıstrdiń sózine qaraǵanda, mundaı salyqtyq jeńildikterdi joıý negizinen olardyń tıimsizdigine baılanysty bolyp otyr.

«Jalpy, elimizde ıkemdi salyqtyq saıasat qalyptastyrý boıynsha jumystar odan ári jalǵasady. Tutastaı alǵanda, Qazaqstanda salyq salýdyń jetkilikti joǵary deńgeıine baılanysty salyqtyq jeńildikter qoldaný normalary ózin-ózi aqtady deýge keledi. Toqtala ketetin jaıt, Qazaqstan sońǵy jyldary salyqtyq júktemelerdiń ıkemdiligi jaǵynan da, tutastaı alǵanda jekelegen salyqtyq jeńildikterdi qoldaný boıynsha da sheteldik ınvestorlar úshin tartymdy bola bastady», - deıdi M. Qusaıynov.