Tıbette shyrqalǵan «Farıda» áni 10 mln qaralym jınady – eksklıýzıvti suhbat

<p>ASTANA. KAZINFORM &ndash; Ótken aptada Qytaıdyń Tiktok jelisinde &laquo;Farıda&raquo; áni kóp qaralym jınap, tanyla bastady. Tıbet halqynyń ulttyq kıimin kıip, qazaqsha án shyrqaǵan jas bloger Doń Djý KAZINFORM agenttigine suhbat berdi.&nbsp;</p>

Agenttik anyqtaǵandaı, 23 jastaǵy Doń Djý Qytaıdyń Tıbet avtonomdy aýdanyna shekaralas Sychýan provıntsııasynda turady. Óz aımaǵynda blogerlikpen aınalysady. Sondaǵy qazaq dostarynan estigen yrǵaqty ándi aǵasynyń úılený toıynda aıtyp shyqqan. 

«Qazaqstanǵa baryp kórmedim. Qytaıda kóptegen qazaq halqy turatynyn, tilderińiz uıǵyr tilimen uqsas ekenin bilemin. Bala kezimnen hobbı retinde án salamyn. Dúngen, qytaı, qazaq, uıǵyr ánderin aıtamyn, ásirese kóńildi, yrǵaqty ánderdi jaqsy kóremin», - deıdi Doń Djý. 

Alǵash ret «Farıda» ánin 2003 jyly «Mýzart» toby oryndaǵan edi. Alaıda qytaılyq bloger bul ánniń Ǵazızhan Shekerbekov jasaǵan jańa mýzykalyq aranjırovkasyn paıdalanǵan. 

«Bul beınerolık Qytaıdyń áleýmettik jelilerinde 10 mıllıonnan astam qaralym jınady. Onyń ishinde Shyńjań-Uıǵyr avtonomdy aýdanynda eń kóp kórilgen jáne Іle qazaq avtonomııalyq oblysyndaǵy Іle qalasynyń radıoarnasynda qoıylypty. Qytaıdyń Tiktok-tan basqa áleýmettik jelilerine de tarady. Maǵan sońǵy úsh kúnde 20 myń jańa kórermen qosyldy», - deıdi bloger. 

Sonymen birge Doń Djý beınerolıkte kórsetilgen Tıbet halqynyń «Hadak» dástúri týraly aıtyp berdi. Hadak – Tıbet halyqynyń túrli toı-jıynynda qurmetti adamǵa syılanatyn túrli-tústi jibek matalary. Onyń árbir túsi mahabbatty, turaqtylyqty, aqyl, meıirim, tazalyqty bildiredi.