TIACA uıymynyń Ortalyq Azııadaǵy alǵashqy is-sharasy Astanada ótip jatyr

<p>ASTANA. KAZINFORM — Búgin elordada júk tasymaly jáne logıstıka jónindegi óńirlik forým óz jumysyn bastady. Atalǵan shara halyqaralyq áýe júkteri qaýymdastyǵynyń (TIACA) bastamasymen ári Qazaqstan Respýblıkasynyń Kólik mınıstrligi men Qazaqstannyń avıatsııalyq ákimshiliginiń qoldaýymen ótip jatyr.</p>

Іs-sharanyń ashylý saltanatynda Kólik mınıstri Marat Qarabaev, Halyqaralyq áýe júkteri qaýymdastyǵy (TIACA) tóraǵasy Stıven Polmans, TIACA bas dırektory Glın Hıýz jáne Qazaqstannyń avıatsııalyq ákimshiliginiń bas dırektory Katalın Radý jyly lebizderin bildirip, óńirlik forýmnyń jumysyna sáttilik tiledi.

Foto: Azamattyq avıatsııa komıteti

Silk Road in the Sky — Kazakhstan Cargo Hub forýmy Qazaqstan Respýblıkasynyń 2030 jylǵa deıingi kólik-logıstıkalyq áleýetin damytý tujyrymdamasyn iske asyrýǵa eleýli úles qosýǵa baǵyttalǵan.

Forým barysynda jekelegen uıymdar arasynda kelissóz júrgizilip, onyń qorytyndysy boıynsha birqatar áýejaı (Astana, Qaraǵandy, Aqtóbe qalalaryndaǵy áýejaılar) MNG Airlines, MSC Air Cargo SA, Coyne Airways Limited jáne Alpha Sky (Kazahstan) (TBC) kompanııalarymen birlesken qujattarǵa qol qoıylady. 

Sondaı-aq TIACA men jergilikti áýejaılar (Aqtaý, Aqtóbe, Astana, Qaraǵandy, Oral áýejaılary) jáne SCAT áýe kompanııasy arasynda, sondaı-aq TIACA Halyqaralyq áýe júkteri qaýymdastyǵy men JARUS uıymy arasynda yntymaqtastyq týraly memorandýmdarǵa qol qoıylady dep josparlanyp otyr.

Foto: Azamattyq avıatsııa komıteti

Forýmǵa álemniń 30 elinen 300-den astam adam qatysyp jatyr.

Olardyń qatarynda júk tasymaldaý tizbegine qatysatyn ártúrli uıymdardyń ókilderi bar.

Atap aıtqanda, júk jóneltýshiler, ekspedıtorlar, jerde qyzmet kórsetý provaıderleri, áýejaılardy, áýe kompanııalaryn, óndirýshilerdi jáne aqparattyq tehnologııalardy jetkizýshiler.

Forým sheńberindegi sessııa barysynda sala mamandaryna kelesi baǵyttar boıynsha ózekti máselelerdi talqylaýǵa múmkindik beriledi: salanyń normatıvtik-quqyqtyq bazasy, júk tasymaldaý salasynyń qazirgi jaǵdaıyna sholý, mýltımodaldyq logıstıka, áýe júk tasymalynyń habtary, ınnovatsııalary jáne tsıfrlandyrý máseleleri, elektrondyq kommertsııanyń múmkindikteri, júk tasymalynyń turaqty damýy jáne turaqty avıatsııalyq otynǵa qatysty máseleler (SAF).

Foto: Azamattyq avıatsııa komıteti

Qazaqstandyq kompanııalardyń jahandyq qoǵamdastyqpen ózara is-qımyly jáne ozyq tehnologııalardy qoldaný Ortalyq Azııa elderimen taýar aınalymyn 2,4 ese, ıaǵnı 6,3 mlrd-tan 15 mlrd AQSh dollaryna deıin, onyń ishinde qazaqstandyq eksportty 560 mln AQSh dollaryna ulǵaıtýǵa múmkindik beredi.

Foto: Azamattyq avıatsııa komıteti