Threads qosymshasyna bir aptada 100 mln adam tirkeldi

SAN-FRANTsISKO. QazAqparat- Jańa Threads qosymshasyn paıdalanýshylar sany nebary bir aptanyń ishinde 100 mıllıonnan asty, ol mundaı kórsetkishke tipti ChatGPT chat botynan da tez jetti, dep habarlaıdy QazAqparat The Verge basylymyna silteme jasap.

OpenAI chat-boty bul kórsetkishke eki aıdan keıin jetti, al sársenbide ǵana iske qosylǵan Meta-nyń Threads qoldanbasy oǵan birneshe kún ishinde jetti.

Paıdalanýshylar sanyn Threads paıdalanýshylary bazasynyń ólshemin baqylaıtyn Instagram qoldanbasynan bilýge bolady.

Threads qoldanbasy birden hıtke aınaldy. Alǵashqy eki saǵatta qoldanýshylar sany 2 mıllıonǵa jetip, keıin birtindep 5 mıllıon, 10 mıllıon, 30 mıllıon, odan keıin 70 mıllıonǵa deıin ósti.

Meta bas dırektory Mark Tsýkerberg juma kúni «nátıjesi biz kútkennen áldeqaıda asyp tústi» dedi.

Paıdalanýshylar tirkelip qana qoımaı, jazba da qaldyryp jatyr.

Beısenbidegi kórsetkish boıynsha qoldanbada 95 mıllıonnan astam post jazylyp, 190 mıllıon laık basylǵan.

Instagram basshysy Adam Mosserıdiń aıtýynsha, Meta Twitter qoldanbasyn almastyrýǵa talpynbaıdy.

Aıta keteıik, Threads iske qosylǵannan keıin qoldanýshylardyń narazylyǵyn týdyryp úlgerdi, dep habarlady Daily Mail.

Olar jańa áleýmettik jelini Instagram jelisinsiz qur ózin óshirý múmkin emestigine tań qaldy, óıtkeni eki qoldanba bir-birine baılanǵan.

Buǵan deıin Twitter-ge básekeles bolatyn jańa áleýmettik jelige bir táýlikte 30 mln adam tirkelip úlgergenin jazǵan bolatynbyz.