THKB dálizi boıynsha Qytaıdan lıtıı-ıondy batareıalardy tasymaldaý kózdelip otyr
Kezdesý mınıstr Marat Qarabaevtyń Beıjińge jumys sapary aıasynda uıymdastyryldy. Kezdesý barysynda qazaqstandyq vedomstvo basshysy Lıý Veı myrzany Qytaıdyń jańa kólik mınıstri qyzmetine kirisýimen quttyqtap, kólik salasyndaǵy yntymaqtastyqty odan ári nyǵaıtýǵa daıyn ekenin bildirdi.
Taraptar temirjol jáne avtomobıl kóligi salasyndaǵy tasymaldaý kóleminiń aıtarlyqtaı ulǵaıǵanyn, elder arasyndaǵy reıster sanynyń, sondaı-aq Transkaspıı halyqaralyq kólik marshrýty (THKB) boıynsha tasymaldaýlardyń ulǵaıýyn atap ótti. Qazaqstan men Qytaı arasyndaǵy temirjol kóligi salasyndaǵy tasymaldaý kólemi aǵymdaǵy jyldyń 10 aıynda 13%-ǵa ósip, 26,6 mln tonnaǵa jetti.
Avtomobıl kóligi salasynda úshinshi toqsannyń qorytyndysy boıynsha tasymaldaý kólemi 60%-ǵa ósip, 1,9 mln tonna boldy. Kelissózder barysynda THKB marshrýtyn birlesip damytý, sondaı-aq júkterdiń úzdiksiz ótýin qamtamasyz etý boıynsha turaqty jumys tobyn qura otyryp, osy dálizdi birlesip júkteý týraly kelisimge qol jetkizildi.
Atalǵan kelisim sheńberinde osy jyldyń jeltoqsanynda THKB dálizi boıynsha Qytaıdan lıtıı-ıondy batareıalardy tasymaldaý boıynsha synaq reısin iske qosý josparlanyp otyr.
Qazirgi tańda Qytaıdan THKB boıynsha tasymal kólemi jıyrmafýttyq ekvıvalentte 27 myń konteınerden asyp ketti, bul ótken jyldyń sáıkes kezeńimen salystyrǵanda 25 ese kóp. Sonymen qatar, jańa baǵyttardy qurý jáne Qazaqstan men Qytaı arasyndaǵy transshekaralyq ózender arqyly júk tasymaldaýdy damytý múmkindikteri talqylandy.
Sondaı-aq, kólik vedomstvolarynyń úılesimdi jumysynyń arqasynda mınıstler tsıfrlandyrýdyń nátıjesinde ruqsat blankilerin halyqaralyq avtomobıl tasymaldaryna aıyrbastaýdyń elektrondyq formatyna kóshkenin atap ótti. Bul blankilerdi tikeleı júk jóneltýshilerge tsıfrlyq platforma arqyly bir saǵat ishinde alýǵa múmkindik beredi.