The Ring jýrnaly muqabasynda Golovkınniń sýretin jarııalady

ASTANA. QazAqparat - The Ring jýrnaly jeltoqsan aıyndaǵy nómeriniń muqaba betin kórsetti, dep habarlaıdy Sports.kz.

Tanymal jýrnaldyń muqaba betinde WBA (Super), WBC, IBF jáne IBO tujyrymdary boıynsha ortasha salmaqtaǵy álem chempıony qazaqstandyq Gennadıı Golovkınniń (37-0-1, 33 KO) fotosy jarııalanǵan.

«Osy aıdaǵy jýrnaldyń muqabasynda P4P-reıtıngisiniń kóshin bastap turǵan Gennadıı Golovkın», - dep jazdy The Ring Tvıtterdegi paraqshasynda.

Aıta keteıik, Golovkın rıngke 2018 jyldyń 5 mamyrynda oralyp, meksıkalyq Saýl Alvarespen (49-1-2, 34 KO) qarymta jekpe-jegin ótkizedi dep kútilýde. Eger taraptar mamyr aıyna kelise almasa, Gennadıı naýryz nemese sáýir aıynda basqa qarsylasymen kezdespekshi.