THE: QazUÝ menedjmentiniń joǵary baǵasy

ALMATY. QazAqparat - Álemge tanymal «Times Higher Education» agenttiginiń zertteý qorytyndysy boıynsha ál-Farabı atyndaǵy Qazaq ulttyq ýnıversıteti úzdik menedjmenti bar Azııadaǵy joǵary oqý oryndarynyń top-10 kóshbasshysy qataryna kirdi. Bul jóninde oqý ornynyń baspasóz qyzmetine silteme jasap QazAqparat habarlaıdy.

Jetekshi qazaqstandyq ýnıversıtet «THE Asia Award-2020» reıtınginiń kóshbasshylyq jáne menedjment boıynsha úzdik komanda nomınatsııasynda «Outstanding Leadership and Management Team» atap ótildi. Óziniń joǵary básekege qabilettiligi men basqarý tıimdiligin rastaı otyryp, QazUÝ postkeńestik keńistiktegi elderdiń jalǵyz joǵary oqý orny bolyp qurlyqtaǵy 10 myńnan astam jetekshi ýnıversıtetteri arasynda úzdik ondyqqa endi.

Úderistik menedjment, nátıjege baǵyttalǵan basqarý men qyzmetti baǵalaýdyń reıtıngtik júıesin engizý, barlyq bıznes-úderisterdi avtomattandyrý, Smart-tehnologııalar men Big Data paıdalana otyryp sandyq ınfraqurylymdy, sondaı-aq aqparattyq zııatkerlik-saraptamalyq júıeni qurý, QazUÝ-dyń jetekshi oryndy ıelenip otyrǵan kóptegen álemdik reıtıngterde tabysty jáne qarqyndy jyljýynyń kepili boldy. Qazirgi ýaqytta aldyńǵy qatarly QazUÝ-dyń tájirıbesin sheteldik joǵary oqý oryndary zerttep, qabyldap jatyr, al Maıkrosoft kompanııasy ýnıversıtetti damytýdyń tsıfrlyq modelin úzdik tájirıbelerdiń biri retinde moıyndady.

Aıta keterlik jaıt, bıyl Delıdegi búkilálemdik INBUSHERA-2020 sammıtte QazUÝ rektory Ǵalym Mutanov menedjment jáne jahandyq deńgeıdegi kásipkerlik, ǵylym salasyndaǵy belgili novator ǵalymdarǵa beriletin «Amity Global Academic Excellence Awards» halyqaralyq syılyǵyna ıe boldy.