Testileýge jalǵan qujatpen kirmek bolǵan 18 adam ustaldy

NUR-SULTAN. QazAqparat – Bıyl UBT-ǵa jalǵan qujatpen kirmek bolǵan 18 adam ustaldy. Bul týraly QR Bilim jáne ǵylym vıtse-mınıstri Qýanysh Erǵalıev aıtty, dep habarlaıdy QazAqparat tilshisi.

«Túsýshiler úsh deńgeıli júıe boıynsha - Face ID jeke basyn sáıkestendirý júıesi arqyly, jeke kýáligi boıynsha jáne jáne otyrǵyzý ornymen jeke basyn sáıkestendirý arqyly tekserilip, testileýge jiberildi. Face ID júıesiniń arqasynda testileýge jiberý barysynda 18 bóten adam anyqtaldy», - dedi ol mınıstrliktiń apparat jınalysynda.

Onyń atap ótýinshe, 2020 jylmen salystyrǵanda anyqtalǵan mundaı adamdardyń sany 2 esege ósken.

«18 adamnyń 9-yna qylmystyq is qozǵaldy. Bul rette astanalyq 4 oqýshy jeke basyn kýálandyratyn qujattaryn qoldan jasatyp, ózderiniń ornyna joǵary oqý ornynyń stýdentin jibergen eken. Tıisinshe olardyń derekteri quqyq qorǵaý organdaryna tapsyrylyp, tergeý amaldary júrgizilip jatyr», - dedi Qýanysh Erǵalıev.