«Testileýden qutylsaq, másele sheshile me» - baspasózge sholý

ASTANA. QazAqparat - «QazAqparat» halyqaralyq aqparat agenttigi 22 tamyz, juma kúni jaryq kórgen respýblıkalyq buqaralyq aqparat quraldarynda jarııalanǵan ózekti materıaldarǵa sholýdy usynady.

"Elbasy Nursultan Nazarbaev Sháken Aımanov atyndaǵy «Qazaqfılm» AQ prezıdenti Ermek Amanshaevty qabyldady, dep habarlaıdy "Egemen Qazaqstan" basylymy.

Basylymnyń jazýynsha, atalmysh kezdesýde otandyq kınema­tografııanyń jaǵdaıy men damý perspektıvalary, kınostýdııanyń qazirgi jumysy, sondaı-aq aldaǵy kezeńge arnalǵan jos­parlary talqylandy. Mem­leket basshysy búginde kınostýdııa qazaqstandyqtardyń mádenı damýynda aıryqsha ról atqaratynyna nazar aýdardy. Osy salanyń nyǵaıýy úshin memleket tarapynan barlyq qajetti jaǵdaılar jasalýda. Kınostýdııa joǵary dárejeli jabdyqtarmen jáne zamanaýı túsirý alańdarymen qamtamasyz etilgen.

"Nursultan Nazarbaev óskeleń urpaqtyń tárbıesine oń yqpalyn tıgizýi tıis patrıottyq taqyryptaǵy fılmder óndirisi qajettigin atap ótti. Prezıdent sondaı-aq, Qazaq handyǵynyń túrli tarıhı kezeńderine jáne sol zamannyń aıtýly tulǵalaryna arnalǵan kınolar túsirýdiń ózektiligine toqtaldy. Nursultan Nazarbaev qazaqstandyqtardyń jas býynyn adamgershilik rýhta tárbıeleýge baǵyttalǵan anımatsııalyq fılmder jasaýdyń mańyzdylyǵyn da atady", - dep jazady gazet "Urpaq tárbıesine oń yqpal etetin fılmder qajet" atty materıalda.

Sonymen qatar "Egemen Qazaqstanda" túrikmenderdiń uly oıshyly Maqtymquly aqyn jaıynda oıtolǵaý jarııalandy.

"Túrikmen halqynyń uly oıshyly, kórnekti aqyny Maqtymquly barsha adamzat balasyna ortaq tulǵa. Onyń bas aıǵaǵy - sóz etkeli turǵan tulǵanyń jatqan jeri Irannyń Gúlstan provıntsııasy búginde musylmandardyń zııarat etetin ornyna aınalǵan. Al, Kıevte, Astrahanda jáne Ózbekstanda aqynǵa arnalyp eskertkishter qoıylǵan.

Maqtymquly poezııasy túrikmen halqymen ortaq tarıhy, tili, mádenıeti men dinimen baılanysty qazaq halqyna jaqyn. Ol tek aqyn ǵana emes, sonymen birge fılosof. Onyń óleńderin búkil dúnıetanym men halyq fılosofııasyn túsiný arqyly oqý kerek. Bul tusta ol qazaqtyń uly oıshyly men aqyny Abaıǵa uqsaıdy», - delingen "Maqtymquly - sóıler sózi túrikmenniń" atty maqalada.

***

"Aıqyn" gazetiniń búgingi sanynda "Testileýden qutylsaq, másele sheshile me" atty taqyryppn UBT-ǵa qatysty materıal jarııalandy.

"Qazaqstan Ulttyq biryńǵaı testileýden qutylýy kerek, ol ózine júktelgen mindetti oryndap boldy. Keshe Astanada ótken bilim salasy qyzmetkerleriniń «Tamyz keńesinde» osyndaı eldi eleń etkizer málimdeme jasaldy", - dep bastalady maqala.

"Jalpy, Bilim jáne ǵylym mınıstrligine jan-jaqtan UBT-ny ózgertý jónindegi keńes-usynymdar túsip jatqan kórinedi. Dástúrli osy jıyndarynda ustazdar túlekterdiń jappaı testileýdi tapsyra almaı qalýy ózderiniń de jandaryna qatty batatynyn, jabyǵatyndaryn jetkizip jatty.

- UBT óziniń áleýmettik mindetin oryn­dady, endi ony qaıta qurý kerek, - degen usynys aıtty «Nazarbaev ýnıver­sıtetiniń» stýdenttik ister jáne halyqara­lyq yntymaqtastyq jónindegi vıtse-prezıdenti Qadısha Daıyrova. - Biz odan bas tarttyq. Óıtkeni oqýshylar daıyn jaýaptary bar testileýge jaýap berýge jaman úırenip alady, ondaı bilimdi ıgerý qıyn emes", - deıdi basylym.

"Statıstıkalyq komıtettiń ultqa qatysty demografııalyq deregi jyl ótken saıyn jaǵymdy bolyp barady"dep habarlaıdy "Aıqyn" "Qazaqtyń qarasy kóbeıip keledi" atty maqalada.

Ásirese, soltústik oblys­tardaǵy jaǵdaı jaqsarǵan. 2014 jyldyń 1 qańtaryndaǵy málimet boıynsha Aqmola, Qaraǵandy, Qostanaı, Pavlodar jáne Sol­tústik Qa­zaqstan oblystaryndaǵy qazaqtar halyq­tyń jalpy sany­nyń 50 paıyzdan tómengi kórset­kishin qurap otyr. Demek, buryn­ǵyǵa qaraǵanda jaqsy, 50 paıyzǵa jeteǵabyl ekenbiz. Aǵymdaǵy jyldyń basynda qa­zaqtar Aqmola oblysynda jalpy halyq sanynyń 49,2 paıyzyn qurady. Buryn-soń­dy bolmaǵan jaǵymdy jańa­lyq, jaqsy derek bul!

"Atalǵan aımaqta orystar - 34,5 paıyzǵa, ýkraındar - 4,7 paıyzǵa tómendedi. Qara­ǵandyda da demografııalyq qarqyny­myz óte jaqsy, qazaqtar halyqtyń 49,1 paıyzyn qurap otyr. Orys hal­qynyń ókilderi - 37,4, ýkraın­dar bar-joǵy 3,3 paıyzǵa jetti. Qostanaıda da burynǵydaı emes, qaramyz qoıýlana túsipti - 38,8 paıyzǵa jetippiz. Al orystar jalpy halyqtyń 42,1, ýkraındar 8,9 paıyzyn quraıdy. Pavlodarda da sońǵy jyldary qarakózderdiń kóbeıgeni aıqyn baıqala bastady. Munda qazaqtar - 49,8, orystar - 37, ýkraındardyń ósý deńgeıi 4,8 paıyz kórsetkishti kórsetip tur. Demo­gra­fııalyq ósim týraly alańdaǵanda, soltús­tikke qaraı­laı beretinimiz bar. Bul aımaqta qaramyz áli az, bar-joǵy 34,2 paıyz deńgeıde ekenimiz oılan­dyrmaı qoımaıdy. Al bul óńirde orystardyń salmaǵy basym, 49,9 paıyz kórsetkishpen tarazynyń bir basyn basyp tur. Munda 4,5 paıyz ýkraın­dar men ózge ulys ókilderi turatynyn aıta ketken jón", - delingen materıalda.

"Osy ýaqytqa deıin eldegi ult pen ulys­tardyń demografııalyq ósimi jaıly aıt­qanda, osy bes oblys týraly qınala derek kelti­retinimiz jasyryn emes. Endi mine, qarakózderdiń burynǵydan kóbeıe bas­taǵany baıqala basta­dy. Demek, Úkimettiń júrgizip otyr­ǵan ońtústiktegilerdi sol­tústik aımaqqa kóshirý, jastarǵa soltústik óńirge oqýǵa túsýge kóbirek grant bólý saıasatyna endi belsendirek ún qatýymyz kerek", - dep oı tastaıdy basylym.

*** Oral qalasynda mıllıard teńgeden astam qarajatty qoldy qylǵan AKELLA JShS quryltaıshysy Alına Hakaloǵa qatysty sot protsesi bastaldy, dep habarlaıdy "Ekspress K" gazeti.

"Jastyǵyna jáne súıkimdiligine qaramastan, sottalýshy qasqyr aılaly, qadalǵan jerinen qan almaı ketpeıtin qyz, al onyń quıtyrqy áreketterinen tipti USAID uıymynyń bedeline nuqsan kelgen", - dep jazady basylym.

Materıal qujattaryna qaraıtyn bolsaq, Alına Hakalonyń boıynda naǵyz qylmystyq daryn tunyp jatyr. Arty qýys iske túspes buryn onyń halyqaralyq "Pragma" atty kompanııada jáı ǵana keńesshi qyzmetindegi tájirıbesi bolǵan. Degenmen onyń iri kólemdegi aqshalaı qarajatty urlaýǵa arnalǵan qylmystyq mehanızmi uzaq ýaqyt boıy esh kemshiliksiz sátti atqarylyp kelgen. Tolyǵyraq "AKELLA promahnýlas" atty materıaldan oqýǵa bolady.