Terrorlyq uıymdardyń jas qyzdardy Internet arqyly óz qataryna shaqyrýy alańdatyp otyr - BUU

ALMATY. QazAqparat - «DAISh», «Boko haram» jáne «Ash-Shabaab» sekildi terrorlyq uıymdar Internet, áleýmettik jeliler arqyly óz ıdeologııalaryn taratý, qarjy jınaý jumystaryn júrgizip otyr. Kórshi Qyrǵyz elinen shyqqan lańkesterdiń 20 paıyzy áıelder.

Mundaı málimetti búgin Almatyda bastalǵan «Terrorıstik jáne ózge de transulttyq sıpattaǵy qylmystardy jasaý maqsatynda Internet jelisin paıdalanýmen baılanysty isterdi qylmystyq qýdalaý jáne sotta qaraý praktıkasy» taqyrybyndaǵy aımaqtyq semınarda BUU-nyń Esirtki jáne qylmys boıynsha basqarmasynyń ókili Olga Zýdova keltirdi, dep habarlaıdy QazAqparat tilshisi.

Olga Zýdovanyń aıtýynsha, DAISh aýmaǵyna áıelderdi, qyz-kelinshekterdi tartý áreketi búginde belsendi júrip jatyr.

«Áıelder terrorlyq qozǵalystarda mańyzdy ról atqaryp júr. Málimetter boıynsha, Eýropadan 550 áıeldiń DAISh baqylaýyndaǵy aýmaqqa ótip ketkenin bildik», - dedi ol.     

Olga Zýdova baıandamasynda terrorlyq uıymdar Internet, áleýmettik jelilerdi belsendi paılanyp otyrǵanyn jetkizdi.

«Sońǵy ýaqytta Internet arqyly terrorızmdi úgitteýshi áıelderdiń qatary artyp kele jatqany alańdatady. Olar jas qyzdardy óz maqsattaryna paıdalaný úshin qatarlaryna tartyp jatyr» degen Olga Zýdova kórshi Qyrǵyz elinen shyqqan lańkesterdiń 20 paıyzy áıelder ekenin aıtty.

Sonymen qatar, aımaqtyq semınarda BUU Qaýipsizdik keńesi komıtetiniń tóraǵasy Raımond Mýrmokaıteniń 2015 jyldyń 15 jeltoqsanynda BUU-nyń Qaýipsizdik keńesi tóraǵasyna joldaǵan hatyndaǵy málimetterdi jarııa etken Olga Zýdova óz baıandamasynda shetelde qazaqstandyq 300 sodyr soǵysyp júrgenin aıtty.

Onyń aıtýynsha, shet elderde Ázerbaıjannan 271, Qazaqstannan 300, Qyrǵyz elinen 350-den astam, Reseıden 2 700, Tájikistannan 300, Ózbekstannan 200-300 sodyr júr.

Aıta keteıik, búgin Almatyda BUU Esirtki jáne qylmys boıynsha basqarmasynyń (EQB) «Aýyr jáne transulttyq sıpattaǵy qylmystardyń aldyn alý jáne olarmen kúres maqsatynda memleketterdiń áleýetin nyǵaıtý» atty ǵalamdyq baǵdarlamasy sheńberinde Qazaqstannyń Joǵarǵy soty men BUU EQB-nyń uıymdastyrýymen aımaqtyq semınar bastaldy. Semınar úsh kúnge sozylady. Jıynǵa Qazaqstan, Reseı, Izraıl, Armenııa, Ázerbaıjan, Grýzııa, Qyrǵyzstan, Ózbekstan, Túrkimenstannyń Joǵarǵy jáne basqa da sottarynyń sýdıalary jáne sarapshylary qatysýda.