Terrorızmge qarsy zańnamaǵa ózgerister der kezinde qolǵa alyndy - Baıdek

ASTANA. QazAqparat - Terrorızmge qarsy zańnamaǵa ózgerister engizý ýaqytyly qolǵa alynýda. Bul týraly búgin elordada ótken «Qazirgi kezeńdegi ekstremızm men terrorızmniń aldyn alý men jolyn kesýdiń zańnamalyq jáne ınstıtýtsıonaldyq sharalary» taqyrybyndaǵy dóńgelek ústel otyrysy aıasynda QazAqparat tilshisine suhbat bergen Ýspenskıı soborynyń protereıi Dmıtrıı Baıdek aıtty.

«Shyndyǵyn aıtqanda, bul zań jobasynda («Ekstremızm men terrorızmge qarsy is-qımyl máseleleri boıynsha QR birqatar zańnamalyq aktilerge ózgertýler men tolyqtyýlar engizý týraly» Zań jobasy) dindarlar úshin de, barlyq azamattar úshin de eshqandaı shekteýdi kórip otyrǵan joqpyn. Úkimettiń ekstremıstik áreketterdi, terrorızmdi jáne basqa da teris kórinisterdi shekteýmen baılanysty máselelerdi retteý usynystary der kezinde kóterilgen», - dedi ol.

Onyń aıtýynsha, qarý-jaraq aınalymy salasyndaǵy zańnamany qatańdatý óte durys. Óıtkeni, muny búgingi ómirdiń ózi talap etip otyr. Jalpy, zańnamaǵa engizilgen ózgerister zańǵa boı usynatyn azamattardyń ómirine esh keri áseri joq.

Sonymen qatar D.Baıdek memleket jastardy jumyspen qamtý sharalaryn qabyldaý qajet dep sanaıtyndyǵyn basa aıtty. Óıtkeni, áleýmettik problemalar jastardyń alańdaýshylyǵyn týyndatyp, destrýktıvti dinı aǵymdardyń yqpalyna túsýine túrtki bolady.