Terrorızmge qarsy kúres Qazaqstanda mańyzy jóninen birinshi kezektegi másele - Bektas Beknazarov

ASTANA. QazAqparat - QR Parlamenti Senaty tóraǵasynyń orynbasary Bektas Beknazarov «Qazirgi kezeńdegi ekstremızm men terrorızmniń aldyn alýdyń jáne jolyn kesýdiń zańnamalyq jáne ınstıtýtsıonaldyq sharalary» atty dóńgelek ústelde osylaı málim etti.

Parlamenttiń joǵarǵy Palatasy tóraǵasynyń orynbasary ekstremızmge jáne terrorızmge kúres Qazaqstanda da mańyzy jóninen birinshi kezektegi másele bolyp otyrǵanyn atap ótti. «Bul máseledegi bizdiń basty mindetimiz - dinı ekstremızm kórinisteriniń aldyn alý jáne terrorızm qateriniń jolyn kesý arqyly adamnyń, memlekettiń jáne qoǵamnyń qaýipsizdigin qamtamasyz etý», - dedi ol.

Bektas Beknazarov bizdiń elimizdiń ekstremıstik ıdeologııalar men terrorızmge baılanysty dinder men olarǵa qarsy kúshterdiń arasyndaǵy dıalogtyń nyǵaıýy úshin kúsh-jigerdi jalǵastyryp kele jatqanyn atap ótti. Bıylǵy mamyr aıynda «Dinder terrorızmge qarsy» taqyrybyndaǵy halyqaralyq konferentsııa boldy. Forým Qazaqstan Prezıdenti Nursultan Nazarbaevtyń BUU Bas Assambleıasynyń 70-sessııasynda aıtqan terrorızmge qarsy is-qımyl jónindegi bastamalaryn iske asyrý aıasynda ótkizildi. Onda Elbasy terrorızm men ekstremızmge qarsy is-qımyldyń biryńǵaı jahandyq jelisin qurýdy usynǵan bolatyn.

Senat tóraǵasynyń orynbasary halyqaralyq terrorızm men ekstremızm qateriniń keńeıýi zańnamalardyń sapasyna da joǵary talap qoıatynyna jáne terrorızmge, onyń kórinisterine qarsy kúres jónindegi qoldanystaǵy quqyqtyq júıeni turaqty túrde jetildirip otyrýǵa májbúr etetinine dóńgelek ústelge qatysýshylardyń nazaryn aýdardy.

Ol qazirgi ýaqytta ekstremızmge jáne terrorızmge qarsy is-qımyl, qarý-jaraq aınalymy, kóshi-qon máselelerin retteý salalaryndaǵy qoldanystaǵy zańnamany odan ári jetildirýge baǵyttalǵan «Qazaqstan Respýblıkasynyń keıbir zańnamalyq aktilerine ekstremızmge jáne terrorızmge qarsy is-qımyl máseleleri boıynsha ózgerister men tolyqtyrýlar engizý týraly» zań jobasy Parlamenttiń qaraýynda jatqany týraly habardar etti.

«Bul saladaǵy zańnamalyq deńgeıdegi jumystar, eń bastysy dinı ekstremızm men terrorızmdi tazalaýǵa, bul rette bizdiń azamattardyń quqyqtary men zańdy múddelerin qatań saqtaý arqyly, olardy anyqtaýdyń jáne jolyn kesýdiń tıimdiligin arttyrýǵa, sondaı-aq ekstremıstik jáne terrorıstik qyzmettiń saldaryn azaıtý jáne joıý sharalaryn kúsheıtýge baǵyttalatyn bolady», - dep atap ótti B.Beknazarov.