Terrorızm týraly jalǵan habar bergen adamdy bir táýlikte anyqtaı alamyz – elorda polıtsııasy

ASTANA. QazAqparat – Elordada terrorızm týraly jalǵan qońyraýlar jıilegen. Bıyl 102 arnasyna 7 qońyraý túsken. Bul týraly polıtsııa departamenti ekstremızmge qarsy is-qımyl basqarmasynyń bastyǵy Danııar Shymyrqulov aıtty, dep habarlaıdy QazAqparat tilshisi.

Basqarma basshysynyń aıtýynsha, qylmystyń bul túri kóptegen memlekettik organdardyń jumysyna jáne adamdar kóp jınalatyn jerlerde qıyndyqtar týǵyzatyn ortasha aýyr qylmys sanatyna jatady.

«Kóp jaǵdaıda terrorızm aktisi týraly mundaı habarlamalar rastalmaıdy. Negizinen mundaı qońyraýlar jasóspirimderden, mas kúıdegi azamattardan keledi. Sońǵy ýaqytta uıymdardyń atyna elektrondy poshta arqyly habarlamalar túsetin jaǵdaılar jıilegen. Mysaly, jaqynda Binom mektebinde D. esimdi jasóspirim sabaqqa qatyspaý úshin mekteptiń elektrondy poshtasyna bomba týraly hat jibergen», - dedi spıker polıtsııa departamentinde ótken brıfıngte.

Keıbir azamattar sanaly túrde kez kelgen uıymnyń qyzmetine kedergi jasaý úshin osyndaı habarlamalar nemese qońyraýlar jiberedi.

«Polıtsııaǵa mundaı habarlamalardy anyqtaý qıyn emes, alaıda ony jibergen adam jaýapqa tartylady. Bir táýlikte olardyń aty-jónin zamanaýı tehnologııalardyń kómegimen anyqtaımyz. 2022 jyly 102 arnaǵa 157 qońyraý tústi. Onyń ishinde 15 qońyraý boıynsha qylmystyq is tirkeldi, barlyq azamattyń aty-jóni bir táýlik ishinde anyqtaldy. 2023 jyly 7 qońyraý kelip tústi, áli qylmystyq ister tirkelmegen», - dep tolyqtyrdy Danııar Shymyrqulov.