Terrorızm týǵyzǵan apatqa eń aldymen balalar, áıelder jáne qarttar dýshar bolady - Darıǵa Nazarbaeva

SANKT-PETERBÝRG. QazAqparat - Qazaqstan Respýblıkasy Parlamenti Senatynyń Tóraǵasy Darıǵa Nazarbaeva bastaǵan qazaqstandyq parlamentshiler Sankt-Peterbýrgtegi TMD Parlamentaralyq Assambleıasynyń sharalaryna qatysýda. Halyqaralyq terrorızmge qarsy is-qımyl jónindegi konferentsııada sóz alǵan Senat basshysy halyqaralyq terrorızm - qazirgi zamandaǵy eń ótkir máselelerdiń biri ekenin atap ótti, dep habarlaıdy QazAqparat Senattyń baspasóz qyzmetine silteme jasap.

«Terrorızm joıqyn apatqa ushyratady, ekonomıkalyq jáne áleýmettik ómirdiń quldyraýyna alyp keledi. Bul apatqa balalar men áıelder jáne qarttar aldymen dýshar bolady. Adamdar kedeılik pen soǵystan qashýǵa májbúr bolady - jahandyq qaýipsizdikke tónetin qater nazardan tys qalatyn kóshi-qon týǵyzady. Bul óz kezeginde, buǵan deıin turaqty ári qorǵalǵan bolyp kórinetin damyǵan elderde jańa problemalar týǵyzady», - dedi D.Nazarbaeva.

Senat basshysy lańkestikke qarsy kúres - bul jekelegen memleketterdiń nemese olardyń toptarynyń emes, búkil álem qoǵamdastyǵynyń isi ekenine nazar aýdardy. Túrli qarama-qaıshylyqtarǵa qaramastan álemdik jáne óńirlik alyp memleketter Taıaý Shyǵysta IGIL-ge qarsy kúreste is-qımyldy úılestirýdi qolǵa aldy. Degenmen, terrorızm oshaǵy tolyqtaı joıylǵan joq.

Senat Tóraǵasy Qazaqstan terrorızmge qarsy is-qımylda Birikken Ulttar Uıymynyń ortalyq úılestirýshi róline qoldaý bildiredi. 2017-2018 jyldarda BUU Qaýipsizdik Keńesine múshe bolǵan kezdegi bizdiń elimizdiń jeti basymdyǵynyń biri osy másele bolǵan edi. BUU aıasyndaǵy memleketterdiń jahandyq terrorǵa qarsy koalıtsııasyn qurý jónindegi Nursultan Nazarbaevtyń bastamasy álemdik qaýymdastyǵynyń keń qoldaýyna ıe boldy.

Joǵarǵy Palatanyń basshysy 2018 jyldyń qyrkúıek aıynda BUU Bas Assambleıasynyń sessııasy aıasynda lańkestikten azat álemge qol jetkizý jónindegi daǵdy kodeksine qol qoıylǵanyn habardar etti. Bul qujatqa 70-ten astam memleket qosyldy.

«Biz álem qoǵamdastyǵy terrorızm men dinı ekstremızmdi joıatyn jańa tásilder men sheshimder ázirleýdi qajet etetinine senimdimiz. Beıbitshilik pen qaýipsizdik jolyndaǵy kúreste birlikke qol jetkizýdiń balamasyz joly retinde aýqymdy únqatysý qaǵıdattary olardyń negizinde jatýǵa tıis», - dedi D.Nazarbaeva.

Senat basshysy konferentsııaǵa qatysýshylarǵa arnaǵan sózinde jańa syn-qaterler ulttyq parlamentter men parlamentaralyq uıymdar deńgeıinde ózara belsendi is-qımyldy talap etetinin atap ótti. Terrorızmge qarsy is-qımylda ulttyq zańnamalardy úılestirý tabystyń mańyzdy faktory bolyp tabylady.

«TMD Parlamentaralyq Assambleıasy aýqymdy jumystar atqaryp jatqany bizge belgili. Birlesken kúsh-jigerdiń nátıjesinde qaýipsizdik máselelerin retteıtin úlgi zańnamanyń sapaly bazasyn qurý múmkin boldy. Bul jumystar tıimdi parlamentaralyq yntymaqtastyqtyń aıqyn mysaly bolyp tabylady», - dedi Senat Tóraǵasy.

Osy máselege ortaq kózqarasty qalyptastyrý úshin kúsh-jigerdi biriktirýdi maqsat etken konferentsııada terrorızmge qarsy is-qımyldaǵy halyqaralyq ınstıtýttardyń róli, ekstremıstik ıdeıalardy taratýda jelilik tehnologııalardy paıdalanýdy boldyrmaý, lańkesterdi qýdalaý jáne terrorızmdi qarjylandyrýdyń jolyn kesý maqsatynda zańnamany jetildirý máseleleri talqylandy.