Terrorızm qaýpi joǵary elderge shyqpaq bolǵan 559 qazaqstandyq-rekrýttyń joly kesildi
Bul týraly búgin elordada ótip jatqan «Qazirgi kezeńdegi ekstremızm men terrorızmniń aldyn alý men jolyn kesýdiń zńnamalyq jáne ınstıtýtsıonaldyq sharalary» taqyrybyndaǵy dóńgelek ústel otyrysynda QR Ulttyq qaýipsizdik komıteti tóraǵasynyń orynbasary Nurǵalı Bilisbekov málim etti.
«Sońǵy 5 jylda ulttyq qaýipsizdik organdary 559 qazaqstandyq-rekrýttyń terrorıstik belsendilik oryn alyp otyrǵan aımaqqa shyǵýyna jol bergen joq. Búginde qarýly qaqtyǵystar oryn alǵan aımaqtardan sodyrlardyń otanyna oralýy barynsha qaýipti bolyp otyr. Olardyń kópshiligi barynsha radıkaldy kózqarasty ustanýda, arnaıy daǵdyǵa, jaýyngerlik tájirıbege ıe», - dedi ol.
Onyń sózine qaraǵanda, atalǵan tulǵalardyń bizdiń elimizde de lańkestik aktilerdi jasaý qaýpi joǵary. Al óz kezeginde qarýly qaqtyǵystar aımaǵynda qalǵan tulǵalar radıkalızmdi ıdeıalyq turǵyda nasıhattaýshy róline ıe desek te bolady. Olar lańkestik áreketterge rekrýttar men sodyrlardy tartý jumystaryn qarqyndy júrgizýde.
Osy oraıda N.Bilisbekov sońǵy jyldary tamyryna balta shabylǵan radıkaldy toptardyń bir bóligi halyqaralyq lańkestik uıymdardyń tikeleı basshylyǵymen ári nusqaýymen túrli áreketterge barǵanyn basa aıtty.
«Qalǵan toptar aqparattyq nasıhattardyń yqpalynan radıkaldanyp, belsendi qımyldarǵa barýǵa umtylǵan», - dedi QR UQK tóraǵasynyń orynbasary.