Terrorızm dep tanylǵan uıymnyń múlki jedel túrde memleket menshigine ótetin bolady - Prokýratýra
Atalǵan zań jobasy qoldanystaǵy birqatar normatıvtik quqyqtyq aktilerge ekstremızm men terrorızm kórinisterine qarsy kúres sharalaryn kúsheıtýge baǵyttalady. Bul rette qujat arqyly jeke adamnyń, qoǵam men memleket múddeleriniń qorǵalýyn jańa sapadaǵy deńgeıge kóterý kózdeledi. Sonymen qatar, zań jobasy ekstremıstik jáne terrorıstik mazmundaǵy aqparattyq materıaldardyń ákelinýin, basyp shyǵarylýyn jáne taratylýyn boldyrmaýǵa baǵyttalǵan normalardy jetildirýge baǵyttalady.
«Qoldanystaǵy zań boıynsha uıymdy ekstremıstik nemese terrorıstik dep taný úderisi tym uzaq ýaqyt alady. Máselen, prokýror eń aldymen sotqa aryz jiberýge tıis, sot ony bir aı shamasynda qaraıdy, qaralǵannan keıin sheshim shyǵarý úshin sotqa bes kún beriledi. Budan soń úkim kúshine enýi úshin taǵy 15 kún kerek. Barlyǵyna - keminde eki aı. Al taraptardyń kelispeýi oryn alsa, onda bul merzim jarty jylǵa deıin sozylyp ketýi yqtımal»,- deıdi zań jobasy boıynsha baıandaǵan QR Bas prokýrorynyń orynbasary Jaqyp Asanov.
Osyǵan oraı, Bas prokýratýra atalǵan merzimdi aıtarlyqtaı qysqartýdy usynady. «Sot sheshimi qabyldanǵannan keıin, bul birden oryndaýǵa jatýy tıis. Bir sózben aıtsaq, sheshim shyǵysymen ol ekinshi satyda qaralýyn kútpeı, ony oryndaý úshin quzyretti organdarǵa jiberýge sot mindetti bolady. Mundaı tártip ekstremıstik, terrorıstik uıymdardyń qyzmetin tez arada, jedel túrde toqtatýǵa múmkindik beredi», - deıdi Bas prokýrordyń orynbasary.
Budan bólek, terrorıstik uıymdar úgit-nasıhaty BAQ, sonyń ishinde ınternet arqyly belsendi júrgiziletini belgili. Osyǵan oraı, zań jobasynda álgindeı aqparattar terrorıstik dep tanylsa, onda quzyrly organ ondaı basylymdardy birden jaýyp, qoljetimdilikti joıatyn bolady.
«Qazirgi qoldanystaǵy zańda uıym ekstremıstik dep tanylsa da onyń múlkin memleket menshigine ala almaıdy. Mundaı mehanızm bolmaǵan soń zańsyz dep tanylǵan uıymdar ataýlaryn ózgertip, áreketin odan ári jalǵastyrýy múmkin. Máselen, 2012 jyly Shyǵys Qazaqstan oblysynda bir qoǵamdyq birlestik ekstremıstik dep tanyldy. Bul uıymnyń 12 oblysta 100-den astam úıleri, ǵımarattary bolǵan. Osy múliktiń barlyǵyn der kezinde memlekettiń menshigine ala almadyq. Óıtkeni, buǵan zańymyz múmkindik bermedi. Sondyqtan da, jańa zań jobasynda terrorıstik nemese ekstremıstik dep tanylǵan uıymnyń múlki jedel túrde memleket paıdasyna alynatyn bolady», - dedi J. Asanov. Onyń aıtýynsha, atalǵan norma álgindeı teris pıǵyldy uıymdardyń qaıta jandanýyna tosqaýyl bolmaq.