Terrorıstik turǵydan osal dámhana ıeleri jaýapqa tartylýda
SQO Polıtsııa departamenti baspasóz qyzmetiniń málimetinshe, 100-den astam orynǵa arnalǵan qoǵamdyq tamaqtaný nysandary terrorızmnen qorǵalý turǵysynan osal obektilerge jatady. Oblysta olardyń sany – 48. Talapqa sáıkestigin polıtseıler únemi tekserip otyrady. Zańnama talaptaryn buzǵandar ákimshilik jaýapkershilikke tartylady.
Petropavl qalasyndaǵy dámhana ıeleriniń birine vıdeokameralarynyń jaramsyzdyǵy boıynsha jáne ondaǵy jazbalardyń saqtaý merzimi 30 táýlikten kem bolýyna baılanysty 140 AEK kóleminde aıyppul salyndy. Ákimshilik jazaǵa tartýǵa osy mekeme qyzmetkerlerimen terrorıstik qaýiptiń kez kelgen kórinisi kezinde ózin-ózi ustaý qaǵıdalary týraly kýrstardyń ótkizilmeýi de sebep boldy.
Barlyǵy oblys aýmaǵynda 600-ge jýyq terrorıstik qatynasta osal nysan ornalasqan. Onyń ishinde adamdar kóp jınalatyn, asa mańyzdy memlekettik, sondaı-aq strategııalyq jáne qaýipti óndiristik nysandar bar. Jyl basynan jumys tobymen 410 obekti tekserildi. Nátıjesinde terrorızmge qarsy qorǵaný talaptaryn buzýdy joıý týraly 147 uıǵarym shyǵaryldy. 22 basshyǵa qatysty QR ÁQtK 149 jáne 470-baptary boıynsha ákimshilik materıal jınaqtaldy. Jınalǵan materıaldardyń nátıjesinde 20 basshy jaýapkershilikke tartyldy.
«Basty kemshilik – ınjenerlik-tehnıkalyq quraldarmen ǵımarattardyń jetkiliksiz nyǵaıtylyp, sonymen qatar qyzmetkerler arasynda terrorızmge qarsy oqý-jattyǵýlardyń ótkizilmeýi. Terrorızm aktisine baılanysty daǵdarys jaǵdaıynda qoldanystaǵy zańnamany túsindirý jáne obekti basshylary men qyzmetkerlerin oqytý maqsatynda polıtseıler túsindirý jumystaryn júrgizdi», - dedi SQO PD Ekstremızmge qarsy is-qımyl basqarmasy bastyǵynyń orynbasary Spartak Qabdenov.