Terrorıstik belsendi aımaqtardan oralǵan azamattardyń 97 paıyzy radıkaldy kózqarasynan bas tartty

ASTANA. QazAqparat – Terrorıstik belsendi aımaqtardan oralǵan azamattardyń 97 paıyzy radıkaldy kózqarasynan bas tartty, dep habarlaıdy QazAqparat tilshisi.

«Elimizde azamattardyń ar-ojdan bostandyǵy quqyǵyn qamtamasyz etýine, árbir adam óz dinin erkin meńgerip, paıdalana alýyna jaǵdaı jasalǵan. Degenmen, halyq arasynda ulttyq biregeılik, toleranttylyq pen zaıyrlylyq qundylyqtaryn qalyptastyrýǵa baǵyttalǵan aǵartýshylyq qyzmetti maqsatty toptarmen túsindirý jumystary júrgiziledi», - dep atap ótedi Aqparat jáne qoǵamdyq damý mınıstrliginen agenttiktiń resmı saýalyna bergen jaýabynda.

Mysaly, vedomstvo dereginshe, mınıstrlik 2019 jyly terrorıstik belsendi aımaqtardan oralǵan (kámelet jasyna tolǵan) azamattardy teologııalyq-psıhologııalyq ońaltý boıynsha jergilikti atqarýshy organdardyń qyzmetin jalpy úılestirýdi jáne ádisnamalyq súıemeldeýdi júrgizedi.

«Osylaısha, mınıstrlik, quqyq qorǵaý jáne jergilikti atqarýshy organdardyń, sondaı-aq din mamandarynyń birlesken kúsh-jigeriniń arqasynda qazirgi tańda terrorıstik belsendi aımaqtardan oralǵan azamattardyń 97 paıyzy (188-diń 182-i) radıkaldy kózqarasynan bas tartty», - dep naqtylaıdy mınıstrlikten.