Terrorıster óltirgen Dosboldyń oryndalmaǵan armany (FOTO)
11-synypty aıaqtaǵan Dosbol dostarynyń ortasynda
Araǵa 18 jyl salyp, kámelet jasyna jetken Dosboldyń tilegin qup kórgen ata-ana ony batyr bolsyn, Otanynyń tynyshtyǵyn kúzetsin dep áskerge attandyrady. Anasy Dosboldy odan qaıtyp kórmegen desedi, ákesi byltyr Ant qabyldaý rásimine kýá bolǵan. Aqtóbe qalasyndaǵy №6555 áskerı bóliminde boryshyn ótep júrgen qatardaǵy jaýynger Dosbol Erkinbekuly Sapar lańkesterdiń oǵyna keýdesin tosyp, áskerı bólimniń qarý-jaraq qoımasyn aman saqtaǵan adamnyń biri boldy. Osylaısha, Otan aldyndaǵy, ata-ana aldyndaǵy Antyna adal kúıinde kóz jumdy.
S.Erýbaev atyndaǵy ózi oqyǵan mekteptegi sharanyń birinde
Dosbolǵa áskerı úlgidegi kıim quıyp qoıǵandaı jarasqan eken. Tipti, oqýshy kezinde Dosbol áskerı adamǵa tán symbatymen jaqyndaryn súısindirip júrgen.
Dosbol synyptastarynyń arasynda
«Birge oqyǵan oqýshy kezimizde onyń jaman qylyq tanytqanyn kórgen emespin» deıdi bizben suhbattasqan marqum Dosboldyń synyptasy Janar Baıhodjaeva. «Dostarynyń arasynda syıly bolǵan Dosbol atyna zaty saı, baýyrmal, dos boldy. Qarapaıymdylyǵy men salmaqtylyǵy ózine jarasatyn» dep janaryna jas aldy Janar.
(Dosbol men Úlzada)
«Dosbol óte baýyrmal jigit edi»,- deıdi Dosboldyń taǵy bir synyptasy Úlzada Uzaqbaı. «Biz úshin onyń orny erekshe bolatyn. Dosbol aqkóńil, baýyrmal jigit edi. Ol ərdaıym kómek qolyn sozatyn, únemi jaıdarly júretin, ózin baısaldy ustaıtyn» deıdi keýdesine óksik tolǵan Úlzada.
Oqýshy kezindegi Dosbol
Úlzada Dosboldyń halyq bilmeıtin bir syryn ashty. Ol at qulaǵynda oınaǵan shabandoz bolypty. Al, Dosboldyń áskerden kelip oryndaımyn degen basty arman-maqsaty - Qazaqstan quramasy úshin kókpar tartysý bolǵan eken...
Erlikpen qaza tapqan Dosbol Erkinbekuly
Amal qansha, «ulym batyr bolady» degen ata-ananyń da, «júırikke minip, keń dalamda bir júıitkisem ǵoı» degen batyrdyń armany da 5 maýsym kúni terrorısterdiń qolynan qaza tapqan Dosboldyń júregi toqtaǵan sátte, juldyzdaı jerge aǵyp tústi...