Terini qaıta óńdeý salasynda qandaı problemalar bar

<p>ASTANA. KAZINFORM &ndash; Qazirgi kezde respýblıkada qýattylyǵy jylyna 4 mln-ǵa deıin iri qara maldyń terisin óńdeıtin 10-nan astam bylǵary kásiporny jumys isteıdi, biraq olar tek 30% ǵana júktelgen. Olardyń kópshiligi birde istep, birde turalap tur, al keıbirinde únemi shıkizat jetispeıdi. Senator Janbolat Jórgenbaev aýyl sharýashylyǵy óńdeýshileriniń problemalary týraly aıtyp berdi.</p>

«2023 jyldyń qańtar-qarasha aılarynda otandyq kásiporyndar 220 myń iri qara mal terisin qaıta óńdedi, 2022 jyldyń toǵyz aılyq kórsetkishimen salystyrǵanda óndiris 55 paıyzǵa tómendedi. Buny mamandar úshinshi elder tarapynan bylǵary ónimderine suranystyń tómendeýine baılanysty boldy dep otyr. Úkimet mal terisin kádege jaratý máselesine 2014-2015 jyldardan beri ǵana ishinara kóńil bóle bastady. Biraq onyń sıpaty mal terisiniń eksportyn shekteý nemese shekteýdi alyp tastaýmen ǵana retteledi», - dedi senator.

Depýtat salanyń negizgi problemalarynyń qatarynda shaǵyn sharýa jáne fermer qojalyqtarynda óndirilgen ónim sapasynyń tómendigi, shıkizat satyp alýǵa aınalym qarjysynyń bolmaýy, jabdyqtardyń tozý dárejesiniń joǵary bolýy jáne shıkizat daıyndaý júıesiniń kenje qalǵanyn atap ótti.

Senatordyń pikirinshe, bylǵary óndirisi men jartylaı bııazy júndi óńdeıtin iri kásiporyndardy ashý máseleni sheshe alady. Aýyl sharýashylyǵy mınıstrligi qazirgi kezde aýyl sharýashylyǵy ónimderin qaıta óńdeýdi damytýdyń 2028 jylǵa deıingi keshendi josparyn ázirlegen bolatyn.

«Birinshiden, teriden buıym jasaıtyn óndiris oryndaryna jabdyqtar men tehnıkany satyp alýǵa ınvestıtsııalyq sýbsıdııa qarastyrý kerek. Sondaı-aq maldyń terisin óńdeıtin óndiriske shıkizat satyp alý úshin sýbsıdııa men salyq jeńildikteri qaralýy tıis. Árbir óńirde teri jáne jún jınaýdyń servıstik-daıyndaý ortalyqtaryn qurý máselesi ótkir tur. Sonymen qatar, maldy esepke alýdyń jańa tsıfrlyq platformasyn ázirleý kezinde ákimshilendirý men baqylaýdy kúsheıtý tetikteri de eskerilýi tıis», - dedi Janbolat Jórgenbaev Úkimet basshysy Álıhan Smaıylovtyń atyna joldaǵan saýalynda.