Termınologııa jumysyn memlekettik deńgeıde qolǵa alý kerek - Erden Qajybek

ASTANA. QazAqparat - Ahmet Baıtursynov atyndaǵy til bilimi ınstıtýtynyń dırektory Erden Qajybek Elbasynyń Qazaqstan halqyna Joldaýy boıynsha óz pikirin bildirdi, dep habarlaıdy QazAqparat tilshisi. 

Ǵalymnyń pikirinshe, burynǵy Joldaýlarǵa qaraǵanda bıyl Elbasy tsıfrlandyrý, jańa zamanaýı tehnologııalar syndy áldeqaıda joǵary maqsattardy halyq aldyna qoıyp otyr. Bul - elimiz ben memlekettiń bıikteı túskeniniń kórsetkishi.

«Elbasy Joldaýda termınologııaǵa nazar aýdaryp otyr. Shynynda da, termınologııa bizde - kenjelep qalǵan til bilimi salalarynyń biri. Ár sala úshin termınologııa ǵylymynda dáleldengen mólsher boıynsha, keminde 5 myń, ári ketse 10-15 myń termın kerek eken. Qoǵamda 100 sala bar desek, keminde 500 myń termın kerek eken. Al biz sońǵy 20-25 jylda 20-30 myń termındi ǵana bekitip otyrmyz. Dál qazir ulttyq termınologııany, ásirese IT-tehnologııa, ınnovatsııalyq baǵyttaǵy termınderdi bir júıege keltirmesek, artta qalamyz», - deıdi E. Qajybek.

Instıtýt dırektorynyń aıtýynsha, termınologııa - tek qana fılologtardyń jumysy emes, bul - memlekettik deńgeıde qolǵa alynatyn jumys.

«Ulttyq termınologııany qalyptastyrý jumysyna elimizdegi aýyl sharýashylyq, óndiris sekildi barlyq salalary boıynsha tıisti mınıstrlikter, vedomstvolar, komıtetter nemese ulttyq kompanııalar óz salasy boıynsha arnaıy top quryp, ár jańa termındi qarastyryp, qabyldap, keń talqyǵa salýy tıis. Negizgi termınderdi jasaý, talqylaý jáne saraptaý jáne bekitý rásimderin, onyń joldaryn, tártipterin, kestesin, josparyn jasaýy tıis. Sol jospar boıynsha búkil el bolyp jumys isteýimiz kerek», - dep óz sózin tolyqtyrdy ol.

Erden Qajybek byltyr qarasha aıynda Úkimet janyndaǵy ulttyq komıssııa janynan termınologııalyq top qurylǵanyn, birqatar jıyndar ótkenin eske saldy. Jaqyn kúnderi arnaıy saıt ashylyp, barlyq qazaqstandyqtardyń termınshi mamandardyń jumysyn qaraýyna, qadaǵalaýyna jáne keńes berýine múmkindik berilmek.