Termınderdi júıeleýdi barynsha jyldamdatý qajet – Ádilbek Qaba

NUR-SULTAN. QazAqparat – QR Bilim jáne ǵylym mınıstrligi Til saıasaty komıtetiniń uıymdastyrýymen onlaın rejimde «Termınologııalyq baza: tájirıbe jáne tehnologııa» atty respýblıkalyq ádistemelik semınar ótti. Bul jaıynda atalǵan komıtettiń baspasóz qyzmetinen málim etti, dep habarlaıdy QazAqparat tilshisi.

«Búginde órkenıettiń qarqyndy damýy aqparattyq tehnologııalar negizinde termınderdi júıeleýdi barynsha jyldamdatýǵa jeteleıdi. Atalǵan máseleni tıimdi sheshýde «termincom.kz» saıty qajetti platforma bolyp otyr. Al barynsha ıkemdilikke qol jetkizý úshin termınologııalyq baza kez kelgen tildik baǵyt úshin izdeýdi qamtamasyz etýi tıis jáne termınderdiń aqparattyq, lıngvıstıkalyq, tehnıkalyq sıpattamasyn ashyp kórsete alýy kerek», - semınardy ashqan komıtet tóraǵasy Ádilbek Qaba.

Semınar barysynda zaman talaptaryna saı ulttyq termınder bazasynyń qurylymy men qyzmeti, ony ázirleý joldary, halyqaralyq tájirıbe talqylandy.

Іs-sharada «Astana» halyqaralyq qarjy ortalyǵy Ákimshilik departamenti dırektorynyń orynbasary, QR UǴA akademıgi Sherýbaı Qurmanbaıuly «Termınderdiń elektrondy málimet qoryn jasaý – termınqordy basqarý men ony tıimdi paıdalanýdyń mańyzdy tetigi» taqyrybyna toqtalsa, budan keıin sóz alǵan Q.Jubanov atyndaǵy Aqtóbe óńirlik memlekettik ýnıversıtetiniń professory Sábıra Isaqova termınologııalyq baza jasaýdyń halyqaralyq tájirıbelerin saraptady. A.Baıtursynuly atyndaǵy Til bilimi ınstıtýtynyń ǵylymı qyzmetkeri Nurlan Shúlenbaev «Qazaq tiliniń termınologııalyq bazasy: tájirıbesi, baǵdary, áleýeti» baıandamasynda termınografııalyq eńbekterdiń baza jasaýdaǵy mańyzdylyǵyna nazar aýdardy.

Sondaı-aq aýdarmashy, gýmanıtarlyq ǵylymdar magıstri Aınur Baekeeva «Digital Library basqarý júıesi negizinde termınologııalyq baza qurastyrý tájirıbesi», al Sh.Shaıahmetov atyndaǵy «Til-Qazyna» ulttyq ǵylymı-praktıkalyq ortalyǵy Aqparattyq tehnologııa basqarmasynyń basshysy Móldir Baqytqyzy «Elektrondyq termınologııalyq qordyń múmkindikteri» taqyrybynda baıandama jasady.

Semınar taqyryby boıynsha sóz alǵandar termınologııalyq baza jasaý termınderdi birizdendirýdiń mańyzdy qadamy ekendigin biraýyzdan atap ótti. Іs-shara sońynda semınar qatysýshylaryna qarar jobasy tanystyrylyp, spıkerlerge alǵyshat tapsyryldy.