Tergeýshiler birqatar ókilettiginen aıyrylýy múmkin
«Tergeýshi is boıynsha materıaldardy jınaıdy jáne ony dálel retinde tanıdy. Al qorǵaýshy jaǵynda mundaı quqyq joq. Bul óz kezeginde taraptardyń básekelestigine yqpal etpeıdi. Sondyqtan derekterdi dálel retinde taný nemese tanymaý tergeýshi men prokýrorǵa emes, sotqa tıesili bolýy kerek. Nege biz osyny mańyzdy dep sanaımyz? Tájirıbege súıensek, sot tarapy tergeý jınaǵan aıǵaqtarmen ǵana shektelýmen qatar, osy dálelderdiń mártebesin qaıta qarastyrýǵa beıim emes. Sottyń aldyn ala dáleldermen baılanyp qalǵandyǵy - aqtaý úkimderiniń tym az bolatyndyǵynyń basty sebebi», - dep atap ótti Jaqyp Asanov «Qazaqstandaǵy sot bıliginiń táýelsizdigi jáne sot ákimshiligi máseleleri» atty halyqaralyq konferentsııada.
Munymen qosa ol Senatta talqylaýǵa engizilgen zań jobasynda prokýratýra men sot arasyndaǵy ókilettik naqty aıqyndalǵanyn sóz etti.
«Biz eshbir daýsyz sotqa tıisti ókilettikti berdik. Endi dál osyndaı qadamdy tergeý men prokýratýra arasynda iske asyrý qajet. Nege? Búginde tergeýshi istiń basynan, ony sotqa ótkizýge deıin ózi bı, ózi qoja. Ol ózi materıaldardy jınaıdy, ony dálel retinde tanıdy, ózi kúdiktilikti aıqyndaıdy. Sondaı-aq tergeýshi isti Qylmystyq kodekstiń tıisti babyna beıimdep, aıyptaý aktisin shyǵarady nemese qylmystyq isti toqtatady. Ekonomıkalyq yntymaqtastyq jáne damý uıymyna múshe eshbir elde, eń damyǵan 30 elde osyndaı quqyq pen ókilettik tergeýge berilmegen», - deıdi J. Asanov.
Aıta keteıik , atalǵan jıyn barysynda ol prokýratýra organdary kóptegen daýlarǵa qatysýdan bas tartqanyn jetkizdi.
Bul qadamdar óz kezeginde qylmystyq protseske kóbirek nazar aýdarýǵa múmkindik berdi.