Tergeýdiń ádil júrýin qadaǵalaý maqsatynda Májilis depýtattary óńirlerge bardy

NUR-SULTAN. QazAqparat - Memleket basshysynyń tapsyrmasyna sáıkes tergeý amaldarynyń ashyq ári ádil júrýin qadaǵalaý maqsatynda Májilis depýtattary, «Aq jol» partııasy fraktsııasynyń músheleri Berik Dúısenbınov pen Erlik Ómirǵalı Qyzylorda qalasyna bardy. Bul týraly QazAqparat tómengi palatanyń baspasóz qyzmetine silteme jasap habarlaıdy.

Depýtattar qańtar oqıǵasyna baılanysty kúdikti dep tanylyp, tergeý ızolıatorynda qamaýda otyrǵan azamattarmen jáne olardyń jaqyndarymen kezdesti.

Jeke qabyldaýǵa kelgen azamattar qańtar oqıǵasyna qatysy bar degen kúdikpen ustalyp, tergeý ızolıatorynda qamaýda jatqan azamattardyń jaǵdaıy týraly baıandady.

Kezdesý barysynda memleket tarapynan beriletin advokattar máselesi de tereń talqylanyp, qamaýda jatqandardyń týystary aqyly advokattardy jaldaýǵa qaltalary kótermeıtinin jetkizdi.

«Bizdiń tergeý amaldaryna aralasý oıymyzda joq. Tek, myna rasymen de adasqan, jansyq basqan jastardyń qylmyskerlerdiń qataryn tolyqtyrmasa eken, ádildik bolsa eken degen oımen kelip otyrmyz», - dedi óz kezeginde Berik Dúısenbınov.

Jeke qabyldaýǵa kelgen azamattardyń aryz-shaǵymdarymen tanysqannan keıin, depýtattar Qyzylorda oblystyq prokýratýrasynyń ókilderimen de kezdesti. Qyzylorda oblystyq prokýrorynyń orynbasary D.Kataev, Qylmystyq qýdalaý basqarmasynyń basshysy B.Nurmaǵambetov jáne arnaıy prokýrorlar basqarmasynyń basshysy A.Álimbaev tergeý ızolıatorynda qamaýda otyrǵan kúdiktiler boıynsha jáne quqyq qorǵaý organdarymen júrgizilip jatqan jumystar jóninde túsinikteme berdi.

Qyzylorda oblystyq prokýratýrasy ókilderiniń málimdemesine sáıkes kúdikti dep ustalǵan azamattardy uryp-soǵý jáne olardyń densaýlyqtaryna zııan keltirý derekteri boıynsha qazirgi tańda polıtsııa qyzmetkerlerine qatysty 13 qylmystyq is qozǵalǵan.

Sondaı-aq, bul jıynǵa Qyzylorda qalasynyń advokattar kollegııasynyń advokattary da qatysty. Depýtattar tarapypan jeke qabyldaýda bolǵan azamattardyń aryz-shaǵymdary jınaqtalyp, Bas prokýrordyń qaraýyna usynylatyndyǵyn jáne azamattardyń zańdy quqyqtarynyń qorǵalatyndyǵy túsindirildi.