Tergeýdegi kúdikti qashyp ketken Shymkent abaqtysynyń 17 qyzmetkeri jazaǵa tartyldy

ShYMKENT. QazAqparat – Shymkenttegi ýaqytsha ustaý abaqtysynyń 17 qyzmetkeri óz mindetterin buzǵany úshin qatań tártiptik jazaǵa tartyldy. Bul shara jýyrda abaqtydan kúdiktiniń qashyp ketýine baılanysty qoldanylyp otyr. QazAqparat tilshisi bul týraly Shymkent qalasy jáne Túrkistan oblysy boıynsha Qylmystyq-atqarý júıesi departamentine silteme jasap habarlaıdy.

Atalǵan departamenttiń baspasóz qyzmeti málimetinshe, 17 qyzmetkerden bólek, atalǵan abaqtynyń taǵy 1 qyzmetkeri jumysynan bosatyldy.

«Shymkent qalasynyń polıtsııa departamenti atalǵan fakti boıynsha Qazaqstan Respýblıkasy Qylmystyq kodeksiniń 426-baby boıynsha sotqa deıingi tergeý bastady. Al Shymkent qalasy jáne Túrkistan oblysy boıynsha Qylmystyq-atqarý júıesi departamenti qyzmettik tekserý júrgizýde. QR QІJK 201-babyna sáıkes sotqa deıingi tergep-tekserýdiń qalǵan derekteri jarııa etýge jatpaıdy», - delingen departamenttiń habarlamasynda.

Aıta keteıik, bıylǵy 11 mamyrda Shymkent qalasynyń tergeý ızolıatorynan kúdikti qashyp ketken bolatyn. Ol Qylmystyq kodekstiń 188-baby 4-bóligi boıynsha qylmys jasaǵany úshin kúdikti dep tanylǵan. Onyń ýaqytsha ustaý abaqtysynan qashqan vıdeojazbasy áleýmettik jelide tarap ketken bolatyn. Jedel-izdestirý is-sharalary barysynda sezikti 12 mamyr kúni ustaldy.