Tergeý ızolıatoryna dene jaraqatymen túskenderge medkómek kórsetilýde - MÁMS

ALMATY. QazAqparat – Almatyda jappaı tártipsizdik kezinde zardap shekkender men tergeý ızolıatoryna qamalǵandarǵa medıtsınalyq kómek tolyq kólemde kórsetilip jatyr. Bul týraly «Áleýmettik medıtsınalyq saqtandyrý qory» kommertsııalyq emes uıymynyń Almaty fılıalynyń dırektory Tileýhan Ábildaev onlaın brıfıng barysynda aıtty, dep habarlaıdy QazAqparat tilshisi.

«Qańtar oqıǵasy kezinde tergeý ızolıatoryna qamalǵan nemese qandaı da bir jaraqat alǵan jábirlenýshilerge kepildendirilgen tegin medıtsınalyq kómek aıasynda medıtsınalyq qyzmet kórsetilip jatyr. Búgingi kúni bizde zardap shekkenderge qajetti kólemde tıisti medıtsınalyq kómek kórsetilmegeni týraly derek joq», - dedi Tileýhan Ábildaev.

Sonymen qatar, ol medıtsınalyq saqtandyrý qory men qalalyq densaýlyq saqtaý basqarmasy barlyq zardap shekkenderge, sonyń ishinde tergeý ızolıatoryndaǵylarǵa konsýltatıvtik-hırýrgııalyq kómek uıymdastyrǵanyn aıtty.

«Qazirgi ýaqytta saqtandyrý qory men densaýlyq saqtaý basqarmasy Qylmystyq-atqarý júıesi komıteti jáne tergeý ızolıatorymen tyǵyz baılanysta jumys istep jatyr. Jaǵdaı baqylaýda. Zardap shekkenderge medıtsınalyq kómek tolyq kólemde kórsetiledi»,- dedi spıker.