Terezeden sekirmeı, 20 sekýnd kútkende aman qalar edi - TJD órt kezindegi kisi ólimine pikir bildirdi

ALMATY. QazAqparat - «Aqkent» turǵyn úı keshenindegi alapat órt kezinde qaza tapqan Ásel Bekmuhametova terezeden sekirmeı, shamamen 20 sekýnd kútken jaǵdaıda múmkin aman qalar edi. Almaty qalalyq TJD bastyǵynyń mindetin atqarýshy polkovnık Erlan Álibekov osyndaı pikir bildirdi, dep habarlaıdy QazAqparat tilshisi.

«Onyń terezeden sekirgeni belgili boldy. Alaıda, bizdiń bólimsheler ol kezde 5-shi qabatqa jetken bolatyn. Eger ol shamamen 20 sekýnd kútkende bizdiń órt sóndirýshiler esikti ózderi ashyp, ony aman alyp qalar edi. Órt sóndirýshiler úıge kirgen sátte onyń anasyn kórip, ony evakýatsııalady, sóıtip qutqaryp qaldy. Al Ásel ol kezde sekirip ketken edi», - dedi Erlan Álibekov.

Eske salaıyq, biz buǵan deıin Almatyda 16 qabatty úıde órt tutanǵanyn habarlaǵan edik.

Qyzyl jalyn saǵat 18:46 kezinde oqshaýlanyp, sóndirildi. 31 adam, onyń ishinde 16 bala aýrýhanaǵa jetkizilgen.

Amaly qalmaǵan turǵyndar balalaryn terezeden laqtyrdy. Zardap shekkenderdiń ishinde 2 júkti áıel bar.

Keıin Almaty qalalyq densaýlyq saqtaý basqarmasy bir adamnyń qaza tapqanyn habarlady.

Órtten zardap shekken turǵyndar tamaq jáne jatyn orynmen qamtamasyz etildi.

Ásel Bekmuhametovanyń otbasyna qajetti kómek kórsetiledi. Marqumdy jerleý rásimi Almaty oblysy Eńbekshiqazaq aýdany Qarajota aýylynda ótedi.

Almaty oblysynyń ákimdigi jerleý rásimin uıymdastyrýǵa, marqumnyń denesin tasymaldaýǵa járdem beredi.