Teri men júndi óńdeý salasynda sýbsıdııalar engizilmek

<p>ASTANA. KAZINFORM &ndash; El óńirlerinde mal terisi men júnin daıyndaıtyn ortalyqtar qurylady. Bul týraly Parlament Májilisinde mal sharýashylyǵy ónimderin tereń óńdeý taqyrybyna arnalǵan Úkimet saǵatynda Aýyl sharýashylyǵy mınıstri Aıdarbek Saparov aıtty.</p>

«Terini óńdeýdegi problema shıkizattyń tómen sapasyna qatysty. Teriniń jyldyq óndiris kólemi 3,5 mln bolsa, onyń shamamen 600 myńy qaıta óńdeýge jáne eksportqa jiberiledi. Maldyń kóp bóligin soıý kezinde terileri búlinip, bylǵary kásiporyndarynyń talaptaryna sáıkes kelmeıdi. Nátıjesinde, 2023 jyly óndirilgen teriniń 15 paıyzy qaıta óńdeýge jáne eksporttaýǵa jumsaldy», - dedi A. Saparov.

Onyń aıtýynsha, bul máseleni sheshý úshin teriler men júnniń sapasy mańyzdy emes óndiristerdi damytý kerek. Máselen, jelatın men jem-shóp qospalaryn óndirý nemese qurylysqa arnalǵan jylý ustaıtyn materıaldar jasaýǵa nazar aýdarý qajet.

«Keshendi josparda jún men terini óńdeýdi damytýǵa erekshe oryn bólingen. Osy jerde aıta ketetin jaıt, bul salany damytý fýnktsııasy Ónerkásip jáne qurylys mınıstrliginen 2022 jyldyń aıaǵynan bastap qana Aýyl sharýashylyǵy mınıstrligine berilgen.
Sondyqtan 2023 jyldan bastap Investıtsııalyq sýbsıdııalaý erejesinde jún jáne teri óndirý men óńdeý jobasyn iske asyrý qunynyń 25 paıyzyn óteý kózdelgen. Teri óńdeý boıynsha Soltústik Qazaqstan jáne Almaty oblystarynda jalpy qýaty 6,8 myń tonna azyqtyq qospalardy óndiretin 2 joba iske asyryldy. Bul – qýattylyǵy 4,8 myń tonna SK «Proteın» jáne qýattylyǵy 2 myń tonnalyq «Batý Agro» jaýapkershiligi shekteýli seriktestigi. Qazirgi kezde Almaty qalasynda qýaty jylyna 7 myń tonna bolatyn jelatın óndiretin «Iskefe Holding» jaýapkershiligi shekteýli seriktestiginiń ınvestıtsııalyq jobasy pysyqtalyp jatyr», - dedi vedomstvo basshysy.

Onyń sózine qaraǵanda, otandyq óńdeý kásiporyndaryn yntalandyrý úshin teri men júndi óńdeýge tapsyrǵan kezde, fermerlerdi sýbsıdııalaý josparlanǵan. Ónerkásiptik kólemdi qalyptastyrý maqsatynda eldiń barlyq óńirinde mal terisi men júnin daıyndaıtyn ortalyqtardy qurý eskerilgen.

Óz kezeginde Májilis depýtaty Serik Egizbaev teri men júndi óńdeýdiń qoldanystaǵy tehnologııalary eskirgenin, shıkizatty daıyndaý, tasymaldaý jáne saqtaýdyń júıesi joq ekenin aıtty.

«Sonyń saldarynan byltyr jalpy óndirilgen 42 myń tonna júnniń 34 myń tonnasy nemese 81 paıyzy óńdelmeı, órtengen nemese qoqysqa tastalǵan. Mal terisi boıynsha jaǵdaı osylaı, ıaǵnı iri qaranyń 3,5 mln terisiniń 208 myńy nemese 6 paıyzy ǵana óńdelse, qalǵany qoqysta jatyr», - dedi depýtat.